Freundliche Wiener
Herr H. berichtete: „Unlängst steh i am Stephansplatz, kummt a Herr zu mir und sagt: ,Gehn S, durt is a Tourist, der wüll wissn, wiavül Fuß der Stephansturm hoch is. I hab eahm scho gsagt, dass der Südturm hundertsiemadreißg Meter hoch is. Und dass bis zur Türmerstube über 343 Stufen erklommen werden müassn. Und dass ma von oben an wundervollen Blick über die Dächer Wiens hat. Also i find, i war scho sehr auskunftsfreudig.
Aber er gibt ka Ruah und wüll de Hechn unbedingt in Füaß wissn. Habn S vielleicht a Ahnung, wia vül Füaß der Steffl hat?‘
,Bedaure‘, hab i gsagt. ,I bin ka Schuasterbua, i gib gern Auskunft, aber für so Extravaganzen hab i ka Zeit. Der nächste, der kummt, wüll vielleicht wissn, wia vül Klafter de Kirchn hat oder wia vül Ellen. Sagn S anfach, Se san aa net von da, mir Weaner san freundlich, aber ausnutzn lass ma uns net. Sunst wär ma kane Weaner. Weil wir müssn a vur de Touristn unser Image vom grantign Weaner aufrecht erhaltn. Des erwartn de Ausländer von uns. Sunst würdns net auf Urlaub zu uns kumman.‘
Kummt a Dritter und sagt: ,A foot is a englisches Längenmaß. In England wird fast alles nach feet gmessn. Das anzige heute noch übliche Fußmaß, der Englische Fuß, a foot san 30,48 cm oder 12 Zoll, was fast der Schuhgröße 48½ entspricht. Ergo gengan drei auf an Meter.‘
Sag i drauf: ,A foot san a bisserl mehr als dreißg Zentimeter lang? Von dem hab i aber mei Lebn no nix ghört.‘
Mant der Dritte: ,Des lernt ma scho in der Volksschul, aber Se san scho so alt, Se habn scho vergessn, was a foot is.‘
Sagt der Zweite: ,Kinder, streits net, der Tourist fragt grad a junge Dame, de kann Englisch und waß über sämtliche Längenmaße Bescheid. Sie rechnt eahm grad auf an Papierl aus, wia vül feet der Stephansturm hat.‘
Sag i: ,Der Herr hat eben behauptet, dass i ungebildet bin. I verlang a Entschuldigung.‘
Drauf steigt ma der Dritte mitn Fuaß aufn Fuaß und geht furt. Acht Tage hab i an Schlapfn tragn müassn. Es hat höllisch wehtan. Ka Wunder, bei sein Gwicht.“
Der „Dritte“entschuldigte sich.