Wut macht blind
Wie Sie wissen, hab i a Freundin“, sagte der Junggeselle Otto P., 38, zum Bezirksrichter. „Leider is verheirat. I woll mit der Frau scho so oft Schluss machn, weil i dauernd von ihrn Mann Hieb kriag. Aber sie überredt mi immer wieder, dass i zu ihr kumm, wann ihr Gatte in Stockerau is.
Unlängst wieder. Sie ruaft mi an und sagt: ,Geh, kumm zu mir, mei Mann is in Stockerau.‘ Sag i: ,Herst, du waßt, wia oft er scho unvermutet zruckkumma is. Wo soll i mi denn versteckn? Er kennt doch scho a jeds Platzl.‘ Nix hats gnutzt, sie hat mi so sekkiert und telefonisch aufgeregt, dass i zu ihr gfahrn bin.
Na, i bin bei ihr, vielleicht zehn Minutn, hör i scho sein schlürfenden Gang auf der Stiagn. Wann er mit de Füaß schlürft, hat er meistens scho vül Wein geschlürft.
,Hurch zua‘, hab i zu ihr gsagt. ,Heut is ma z bled. Heut versteck i mi net. In kan Kastn und unter kan Bett. Heut setz i mi brav vur eahm hin und red mit eahm. Vielleicht gibt er dich frei.‘
I hab mi gschwind anzogn und hab mi im Wohnzimmer in an Couchsessel gsetzt. Er is sofort vom Vurzimmer an mir vurbei ins Schlafzimmer grennt und hat zu ihr gsagt: ,Gib zua, dei Freund is da im Zimmer!‘
,Naa‘, hat sie gsagt. ,Des stimmt net. Des kann i dir schwörn.‘
,Derzähl ma nix!‘, hat er gschrian und hat in Wäschkastn aufgrissn. ,Sei Auto steht untn. I find eahm scho. I kenn scho de Platzln, wo er se versteckt.‘
Drauf hat er unter de Bettn gschaut, hat aus sein Bett de Matratzn aussegnumma, hat ihr de Tuchert weggrissn und hat de Bettdeckn beim Fenster ausse ausbeidlt, weil er anscheinend glaubt hat, i bin vielleicht drinn. Wia er mi im Schlafzimmer net gfundn hat, is er blind vur Aufregung an mir vurbei ins Bad grennt und hat in der Wann de eingwachte Wäsch umdraht.
Dann hat er im Vurzimmer des Schuachkastl durchwühlt, hat se a Stockerl gnumma und is mit an scharfn Messer zwischen de Büacher auf de Regale gfahrn. Zum Schluss hat er direkt nebn mir a Couch, de was gar net als Bettbank gebaut war, so zerlegt, dass ma jetzt zu dritt drauf schlafn kann, wobei er ma sogar einzelne Brettln aufn Schoß glegt hat. Wia i gmerkt hab, er übersiacht mi eh, bin i aufgstandn und hab mi mit leisem Gruß entfernt.
Er is ma dann nach, mit aner Hackn, aber da war i scho in mein Auto. I hab nix weiter mit eahm gredt, weil: Wer waß, ob er sei Frau freigebn hätt.“
Der Ehemann, der bei dem abbrausenden Auto den Rückspiegel abhackte, war zur Verhandlung nicht erschienen.