Aufs Glatteis geführt

Ich tua sehr gern eislaufn“, sagte der 47-jährige Stefan J. zum Bezirksrichter. „I hab auch a gewisses Können, ma kann fast sagn, i bin a Kunsteisläufer, vor allem deshalb, weil i ja meistens auf künstlichem Eis lauf, und i hab ma beim Eislaufn scho öfters a Pupperl aufzwickt. I hab da a eigene Technik, und zwar kratz i, wann i ma ane aufzwickn wüll, mit meine Schlittschuach gewisse Symbole ins Eis, aus denen die Betreffende dann herauslesen kann, dass i mit ihr anbandln wüll.

Unlängst hab is auf a alleinfahrende Blondine mittleren Alters ohgsehn ghabt. I habs zerst amal in besitznehmender Weise a paarmal umkreist, was technisch gsehn des leichteste is, hab dann vur ihr a Herz ins Eis gschliffn und bin mit an Fragezeichen nachgfahrn, was gar net so anfoch is, weil ma bei an Fragezeichen an Punkt ins Eis springa muass, sunst bleibt des Fragezeichen a gwehnliches S-Hakerl. Sie hat verstanden, was i man, und hat ma an Ring ins Eis gschliffn. Drauf hab i an Bart gschliffn, weil a Ring haßt so vül, wia dass verheirat is. Sie hat aber den Ring wieder auskratzlt, wodurch i neue Hoffnung bekommen und vermutet hab, sie ist vielleicht geschieden. Mit aner gekonnten Pirouette hab i ihr zeigt, dass i a Drahrer bin und gern mit ihr auf a Glaserl Wein gingert, wobei i letzteres durch an klan Achter, sozusagen durch a Achterl, angedeutet hab.

Sie hat draufhin an Fünfer ins Eis kratzt und zwa Nulln dazua, so dass i momentan glaubt hab, sie is ein Eisbein und wüll fünfhundert Euro von mir. Durch an Blick zum Ausgang hats ma aber zu verstehn geben, dass sie um fünfe Schluss macht, und nachdems erst dreiviertl war, wollt i ihr noch durch ein paar gekonnte Schleifen meine Sympathie ausdrücken.

Grad, wia i a dezentes Phallussysmbol ins Eis gschliffn hab, is ihr Mann dazuakumma. Er hat sofort a Messer gschliffn, hat a Kreuz dazuagmacht und hat ma in weiter drohender Weise an Schleifstein, der was ausgschaut hat wia a Grabstein, ins Eis kratzt.

Wia i gsehn hab, der Mann is a Psychopath, bin i furt. Er is ma nach und hat mi draußt, bei der UBahn, ordentlich zsammghaut. Um a Haar hätt i a Kranzschleifn braucht, Herr Rat.“

Der eifersüchtige Ehemann erhielt in Abwesenheit eine Geldstrafe.