Auslage in Arbeit

Alsdann, de Gschicht war a so“, berichtete der Herrenmodenverkäufer Fritz N. dem Bezirksrichter. „I steh neilich bei uns in der Auslag, und ziag denan männlichen Kleiderpuppen de neuesten Sommeranzüge an, kummt draußn de Frau von unsern Chef auf unser Gschäft zua.

A schöne Frau, des muaß i sagn. Mir gfallts immer wieder, und drum hab i mei Arbeit unterbrochen und hab, vielleicht sogar wie gebannt, auf de Frau Chefin aussegschaut.

Sie hat mi aa angschaut, i hab sie angschaut, des wird ja no erlaubt sein, Herr Rat, und wia ma uns alle zwa so anschaun, kriagt sie auf amal an entsetzten Blick, und den Moment hab i scho an wuchtigen Schlag zwischen meine Schulterblattln gspürt.

I drah mi um, steht der Chef hinter mir, mit an Hammer in der erhobenen Hand, und holt grad zum zweitn

Schlag aus. I bin sofort aus der Auslag geflüchtet, und hab um de Rettung und um de Polizei telefoniert. Und sowas spült vurn Bezirksgericht?

Es geht aber no weiter: Wia der Rettungsarzt kumma is, und mi untersuacht hat, hat er sein Huat auf mein Buckl aufghängt, weil i nämlich an Nagl drinnghabt hab. Den hat ma der Chef eineghaut. Ersuche um Überstellung des Täters ins Landesgericht! A Mensch, der aus Eifersucht an Angestellten an Nagl ins Kreuz haut, ghört doch net vurs Bezirksgericht, wo se hintn de Kiebitze ohhaun!“

„Von aner Eifersucht is ka Spur“, verteidigte sich der Herrenmodengeschäftsbesitzer

energisch vor Gericht.

„Dadurch, dass der Herr Fritz wie erstarrt in der Auslag gstandn is, hab i eahm versehentlich, Betonung auf versehentlich, für a Kleiderpuppn ghalten, und hab a Nagerl in seinen Rücken geschlagen, damit i durt an Nylonfaden mit Frühlingsblumen befestigen kann. Ein blöder Fehler! I werd do net mein fähigsten Verkäufer wegen meiner Frau derschlagn! So an Verkäufer kriag i nie wieder. Naja, a bisserl Spaß darf sein, aa wenn mei Frau a so an Witz leider net versteht.“

Da die Verletzung unerheblich und der Hammer sehr klein war, wurde (Fritz N. hat eine wesentliche Gehaltserhöhung bekommen) über den Geschäftsmann ein Freispruch gefällt.