Von guter Qualität
Mei Frau sagt, i muaß mei Gwand austragn, bevur i mir a neichs kauf“, sagt Herr K., der in einem feierlichen schwarzen Anzug aus schwerem Tuch erschienen war, zum Bezirksrichter. „Sie hat ja irgendwie eh recht, weil i bin ja ka junger Bua mehr, dass i nimmer modisch gekleidet sein müaßt, und so a Qualität wie früher gibts ja heut gar nimmer. Aber des dauert halt sehr lang, bis ma des alte Gewand austragt. Der schwarze Anzug zum Beispiel, den i heut anhab, Herr Rat, der is net zum Umbringa. I trag eahm fast täglich, i geh auf a jede Leich, am liabsten bei Schlechtwetter, a Sandsturm, a Hagel, des passt ma, des nimmt eahm her. Aber a Wäu wirds scho no dauern, bis mei Frau sagt: ,Jetzt kannst eahm nimmer tragn.‘ Bitte, der Mai is bis jetzt net immer warm gwesn, des kummt ma zugute.
Als zweites Stück hab i no a Knickerbocker zum Austragn. A Pumphosn. A englischer Stoff, gezwirnt, nicht zum Umbringa. I trags auf Wanderungen, hauptsächlich im Dornengebüsch, aber da blüat i früher von de Wadln, bevur de Hosn an Riss kriagt. Durchs Wasser bin i scho damit ganga, aber der Knickerbocker macht des nix aus. Beim Aussesteign hats mi fast umghaut, sovül Wasser hab i in den Hosenbeinen ghabt, zwa Fischerln hab i drinn ghabt, aber sonst, keine Verfärbung, nix.
Dann is ma de Gschicht mit dem Hund passiert. I geh mit der Knickerbocker durch an Weingarten, kummt ma a Schnauzer entgegen und schnuppert an meiner Rocktaschn. Durt hab i nämlich mei guate Wegzehrung, a Knackwurscht, drinnghabt. Halt, hab i ma denkt, des könnt was werdn. I hab gschwind de Knackwurscht aus der Rocktaschn gnumma und habs in de Hosn gsteckt. Im linkn Sack, wo i a Loch hab, von dem mei Frau nix waß. De Knackwurscht is durch des Loch sofort obe in de Knickerbocker grutscht und is dann durt liegnbliebn. I bin langsam weidaganga, wia wann nix war, der Hund is ma nach und is immer gieriger wurdn. Endlich hat er se nimmer beherrschn könna und hat zuabissn.
Er hat an meiner Hosen umadumbeidlt, dass i fast in de Knie ganga bin. Er hat se in der Wurscht verbissn, hat se aufn Bauch ghaut, hat se aufn Rückn falln lassn, i hab scho ghofft, jetzt und jetzt reißt er ma des linke Hosenban oh. Auf amal hat er zum Winseln angfangt, hat nachlassn, und wia i schau, siech i, dass i zwa Zähnd von eahm in der Hosn steckn hab. Jetzt verlangt sei Herrl, der was ma von der Weitn zuagschaut hat, dass i den Tierarzt zahl. A schwerer Schlag für mi. An meiner Knickerbocker siecht ma überhaupt nix.“
Während der Einvernahme des Hundebesitzers rutschte Herr K. unruhig auf seinem Sessel hin und her.
„So ruiniert er sicher sein schwarzn Anzug“, flüsterte ein Kiebitz amüsiert. Das Urteil wird schriftlich ergehen.