Ausg’steckt is . . .

Bezirksrichter, zu einem Heurigenwirt: „Es ist nicht erlaubt, eigenmächtig ein Verkehrszeichen aufzustellen! Noch dazu ein Selbstangefertigtes, das es nach der Straßenverkehrsordnung gar nicht gibt!“

Der Wirt: „I hab de Tafel nur im Interesse meiner Gäste aufgstellt. Weil in unserer Gassn gibts verkehrsmäßig immer an Buschkawüh. Bei uns is nämlich für de Autos nur de Zufahrt gestattet, aber nicht die Abfahrt. Wer wegfahrt, darf nicht abfahren. Der muaß hinauffahren, aufn Berg. Durt is des Fahrn aber nur für Anrainer erlaubt. Dadurch traut se kaner auffe, außer a gwissn Herrn Anrainer, der was aber aa scho gstraft wurdn is, weil er se nur im Taufschein mit ,a‘ schreibt. Im Führerschein haßt er Anreiner. Drum strafns eahm. Er zagt der Polizei immer sein Taufschein, de wolln aber sein Führerschein sehn. I sag Ihna, bei uns gehts zua. De Funkstreife steht immer obn hinter an Flieder. Grün in Grün, kaner siechts. Wanns es sehn, is zspät. Drum schiabn vül verkehrt zruck, was überhaupt net erlaubt is. Manche bleibn aa steh, mit de is ganz aus. Weil mir habn a Halteverbot in der Gassn, von 0 bis 24 Uhr. Da bleibt net vül Zeit dazwischen. Wias vierazwanzg Uhr is, is scho wieder Null. Des glaubn vül net, aber es is a so. De anzichn, was se helfn könnan, san de Taxler. Weil de tuan ja nur anhalten, wanns de Leit ausselassn, net halten, und anhalten is erlaubt. Natürlich

kummts vor, dass de Polizei an anhaltenden Taxler für an Haltenden halt und anhaltet, aber denan gehts no immer besser wia so an armen Fußgänger, der was überhaupt kan Halt hat. De tameln über de Gassn und san äußerst gefährdet. De Leit gengan z Fuaß, damits trinken dürfn. Und wanns trinkn, dürfns net z Fuaß geh, sunst werdns zsammgschobn.

Für diese Gäste hab i de Tafl aufgstellt. A Gast, a trinkender Fußgänger, dens scho a paarmal über de Füaß gfahrn san, hats in Heimarbeit angefertigt. I ziags wieder ein, wanns gerichtlich net erlaubt is.“

Wegen der Hinweistafel: „Fußgänger mit Schleudergefahr“war es mit einem Polizisten zu einer Auseinandersetzung gekommen. Der Gastwirt entschuldigte sich.