Ewig lockt der Hahnenkampf
de Gschicht war a so“, berichtete Herr T. dem Bezirksrichter. „ I hab damals in aner dringenden Angelegenheit zu an Rechtsanwalt müassn, den sei Büro is leider im viertn Stock; i kumm in des Haus, siech i, der Portier steht grad im Aufzug auf an Stockerl und schrauft a Birn auße. I sag eahm, dass i dringend zum Advokatn muass, schaut er mi an, wia wann i in an Mordfall verwicklt war, und sagt: , Da müassn S zu Fuaß geh, der Aufzug is außer Betrieb.‘
Sag i: , Mit der Birn werdn S do ka Ewichkeit brauchn!‘, gibt er ma ka Antwurt und fangt betont langsam zum Schraufn an. Drauf geh i zum Stiagnhaus, und wia i a Stückl obn bin, bemerk i, der Portier geht zur Haustür und schaut durch de Birn durch, obs wirklich ausbrennt is. I hab mi sofort wieder obegschlichn, bin eine in Aufzug und wollt leise de Tür schliaßn. Den Moment siecht mi der Portier und springt ma in den Aufzug nach. Dersteßt se über des Stockerl, derfangt se bei der Lampnfassung, kriagt an Beidler und geht in de Knia.
I ziag de Tür zua und druck in viertn Stock, der Portier rapplt se auf und druckt an Abwärtsknopf. I hab an Finger auf , IV‘, er hat an Finger auf , P‘, der Aufzug bleibt steh und fangt zum Zittern an.
Ma hat direkt gspürt, wias in eahm arbeit: Soll i jetzt auffe oder obe? Dann is er wieder obegfahrn. Unt wollt der Portier de Tür aufmachn, i habs wieder zuazogn, und mir san wieder auffegfahrn. Drauf hat se der Portier de Birn in Mund gnumma, damit er zwa Händ freihat, und wollt mi von de Knöpf wegzahn. Im Notwehrakt auf engstem Raum, außerdem wars stockfinster, hab i eahm des Stockerl gegn de Schienbanln gsteßn. Er hat mit an nasalen Wehlaut de Birn ausgspuckt und is dann drauftretn, wodurch sie mit an schussähnlichen Knaller zerplatzt is. Obn is scho der Herr Rechtsanwalt am Gang gstandn. Er hat glaubt, es hat se wer derschossn, und i hab eahm glei de Aufzugssache zur rechtlichen Beurteilung vorgelegt. Er hat kurz überlegt und hat dann de Vertretung übernommen. Aber net die meine, sondern de vom Portier, wodurch i, wie mir scheint, in der Angelegenheit Zweiter bin.“
Vergleich: Herr T. muss die Glühbirne ersetzen.