Уладзімір Караткевіч: энцыклапедыя / рэдкал.: В.У. Ваніна (гал. рэд.) [і інш.]. – Мінск: Беларуская Энцыклапедыя імя Петруся Броўкі, 2020. – 432 с.: іл. – ISBN 978-985-11-1257-5.
Д а 90-годдзя з дня нараджэння пісьменніка выдавецтвам выпушчана ў свет унікальнае выданне – энцыклапедычны даведнік, прысвечаны жыццю і творчасці Уладзіміра Караткевіча. Творы класіка беларускай літаратуры і сёння карыстаюцца папулярнасцю сярод чытачоў і маюць значны попыт у пакупнікоў. І гэта не дзіўна: праз свае творы пісьменнік здолеў абудзіць пашану да нашага гістарычнага мінулага, роднай мовы, ён пранікаў у дух эпохі, паказваў колішняе жыццё, не змяняючы яго з пазіцыі сучасных рэалій. Ужо надрукаваны 8-томны збор твораў Караткевіча, у працэсе выдання знаходзіцца збор у 25 тамах, выходзяць кнігі ўспамінаў пра яго. Але да гэтага часу не існавала паўнавартаснага энцыклапедычнага выдання, у якім змяшчалася б адначасова інфармацыя пра творы пісьменніка, пра тых, хто аказаў уплыў на яго творчасць, а таксама пра сучасных паэтаў і празаікаў, мастакоў, якіх натхняе творчасць Караткевіча. Пад адной вокладкай змешчана каля 1000 артыкулаў, прысвечаных жыццю і творчасці пісьменніка, а таксама блізкім і родным, людзям, якія мелі стасункі з ім, даследавалі і даследуюць яго літаратурную дзейнасць. Увайшлі ў даведнік і літаратуразнаўчыя артыкулы па раманах і аповесцях, найбольш значных нарысах У. Караткевіча, падрабязна разглядаюцца мастацкія сродкі, якія выкарыстоўваў пісьменнік, апісваюцца месцы, дзе бываў Караткевіч, сустракаўся з сябрамі, натхняўся на новыя творы. У падрыхтоўцы энцыклапедычнага выдання ўдзельнічалі навукоўцы вядучых ВНУ краіны, Нацыянальнай акадэміі навук Беларусі, Беларускага дзяржаўнага архіва-музея літаратуры і мастацтва, супрацоўнікі Нацыянальнай бібліятэкі Беларусі, журналісты-краязнаўцы. У даведніку змешчана шмат ілюстрацыйных матэрыялаў. Гэта фотаздымкі з архіваў Беларусі і з асабістых архіваў аўтараў, рэпрадукцыі жывапісных і графічных работ, прысвечаных асобе У. Караткевіча і звязаных з мясцінамі, дзе ён бываў. Новае выданне будзе карысна ўсім, хто цікавіцца творчасцю пісьменніка.