ШТУРМАН БЕЛАРУСКАЙ ЖУРНАЛІСТЫКІ
Да 100-годдзя з дня нараджэння прафесара Р.В. Булацкага
Пётр ДАРАШЧОНАК. Штурман беларускай журналістыкі. Публікацыя прысвечана памятнай даце ў гісторыі беларускай журналістыкі – 100-годдзю з дня нараджэння рыгора Васільевіча Булацкага, стваральніка факультэта журналістыкі БДу, вучонага, педагога, прафесара, доктара гістарычных навук. у артыкуле разглядаюцца асаблівасці творчага шляху, аналізуюцца навуковыя дасягненні вядомага вучонага, яго ўклад у фарміраванне сучаснай школы нацыянальнай журналістыкі. Ключавыя словы: факультэт журналістыкі, гісторыя друку, універсітэцкая адукацыя, сродкі масавай інфармацыі. Peter DOROSHCHENOK. Navigator of Belarusian journalism. The publication is devoted to a memorable date in the history of Belarusian journalism - the 100th anniversary of Grigory Vasilyevich Bulatsky, the creator of the faculty of journalism BSU, a scientist, teacher, professor, doctors of historical sciences. The article discusses the features of the creative way, analyzed the scientific achievements of a well-known scientist, its contribution to the formation of the modern school of national journalism. Keywords: faculty of journalism, history of the press, university education, media.
Рыгору Васільевічу Булацкаму – педагогу, навукоўцу, публіцысту, гісторыку журналістыкі, буйному арганізатару нацыянальных СМІ лёс угатаваў незвычайны жыццёвы шлях. Яго журналісцкая школа сёння вядома не толькі ў Беларусі, але і далёка за межамі нашай краіны. Нават у такіх краінах, як В’етнам, Ангола, Іарданія і інш., ёсць выхаванцы факультэта журналістыкі БДУ, якім уручаў на выпускных вечарах дыпломы спецыяліста ў галіне СМІ прафесар Р.В. Булацкі. У час адной са службовых паездак (гэта быў семінар на базе «Маладзечанскай газеты») дацэнт БДУ Наталля Зубчонак звярнула ўвагу на фотаздымак Р.В. Булацкага, які стаяў у рамцы на стале тагачаснага галоўнага рэдактара выдання, выпускніка журфака 1972 года А.А. Хазяніна. На наша пытанне Аляксандр Аляксандравіч адказаў, што для яго, як і для многіх выхаванцаў факультэта журналістыкі, Рыгор Васільевіч – блізкі, родны чалавек. А фота – памяць аб незабыўных гадах студэнцкай вучобы, калі ўсе мы з вялікай стараннасцю засвойвалі азы журналісцкага майстэрства. Мы – гэта ўсе тыя, хто, па вобразнаму выразу Леаніда Екеля, былога старшыні Беларускага саюза журналістаў, «выраслі з шыняля Булацкага». Гэта тысячы студэнтаў, якія вучыліся ў «эпоху Булацкага», вывучалі тэорыю і праходзілі практыку ў раённых газетах, працавалі «на бульбе» і ў будатрадах, змагаліся за гонар факультэта на спартыўных пляцоўках, бралі ўдзел у студэнцкіх навуковых канферэнцыях. Гэта цэлы корпус спецыялістаў у галіне СМІ, якім даў пуцёўку ў творчую прафесію штурман айчыннай журналістыкі, выдатны навуковец, настаўнік і добры дарадца Рыгор Васільевіч Булацкі.