Галоўка, С.А. Стаўбцоўшчына: нататкі пра людзей і гісторыю /
Сяргей Галоўка. – Мінск: Беларусь, 2021.– 175 с.: іл. – (Падарожжа па родным краі). – ISBN 978-985-01-1412-9.
Усерыі «Падарожжа па родным краі», якая заснавана выдавецтвам у 2019 годзе, выйшла чарговая кніга. Яе аўтар, наш калега, журналіст і краязнаўца Сяргей Галоўка, запрашае чытачоў на родную для яго Стаўбцоўшчыну – маляўнічы куточак беларускага Наднямоння. Выданне прысвечана гісторыі краю і вядомым людзям, якія сваёй творчасцю і справамі ўслаўлялі і ўслаўляюць яго. З вялікай любоўю аўтар расказвае пра мясціны, звязаныя з жыццём і дзейнасцю Якуба Коласа, Янкі Купалы, Уладзіслава Сыракомлі, Кандрата Крапівы, Каруся Каганца, Янкі Лучыны, Юзюка Фарботкі. Асобныя раздзелы кнігі прысвечаны землякам: былому загадчыку аддзела культуры Стаўбцоўскага райвыканкама Анатолю Грэкаву, ініцыятару амаль усіх мастацка-культурных мерапрыемстваў у раёне (самае адметнае з іх – літаратурна-мастацкі фэст і свята роднай мовы «Каласавіны», якія ладзяцца штогод у гонар народнага паэта Беларусі Якуба Коласа на яго малой радзіме); настаўніку Старасвержанскай СШ, гісторыку і краязнаўцу І.А. Шавелю; Тадэвушу і Рамуальдзе Сабалеўскім, якія захоўваюць гісторыю роднай вёскі Рубяжэвічы, і інш. Згадвае аўтар і пра свайго дзеда-франтавіка – Якуба Піліпавіча Галоўку, а таксама пра землякоў – удзельнікаў Вялікай Айчыннай. І пра нечаканыя адкрыцці, што здараюцца падчас журналісцкіх камандзіровак. Так, аднойчы ў Маскве, наведваючы мемарыяльны навукова-асветніцкі цэнтр «Бутава», аўтар зацікавіўся гісторыяй Надзеі Ажгірэвіч, якая кананізавана Рускай праваслаўнай царквой. Інтуіцыя не падвяла: аказалася, што святая навамучаніца Надзея родам са Стаўбцоўшчыны. Кніга адрасавана чытачам, якія цікавяцца гісторыяй Беларусі.