Два гады і ўсё жыццё
Як імкліва і незаўважна прамільгнулі яны, гэтыя два гады пасля жніўня 2020-га. Філосафы кажуць, што так звычайна і бывае. Калі здараецца шмат чаго неардынарнага і лёсавызначальнага, падзеі і людзі быццам спрэсоўваюцца ў нашай свядомасці, і ўспрыманне хуткасці жыцця тады зусім іншае, не такое, як пры звычайных абставінах.
Так, час падманвае нас. Але дазволіць сабе такую раскошу, жыць самападманам, мы не можам – занадта вялікая, непамерная цана вымалёўваецца. Урокі 2020 года якраз пра гэта. Пра тое, што не бывае дробязей ці чагосьці нявартага ўвагі, калі справа датычыць лёсу краіны. Беларусі пашчасціла ў галоўным: яна мае Прэзідэнта, які мужна прыняў выклік супраць нашай незалежнасці і свабоды і даказаў, што беларусы маюць права на сваёй зямлі ўладкоўваць сваё жыццё так, як палічаць патрэбным, і ніхто не павінен указваць ім.
Ход падзей у краіне, удзельнікамі і сведкамі якіх мы з´яўляемся апошнія два гады, пераканаўча адказвае на многія пытанні. Можна сказаць, сама гісторыя ў каторы раз стала на бок беларусаў, якія не захацелі ахвяраваць самым дарагім, што ў іх ёсць, не палічылі магчымым здрадзіць.
Часам праскочыць неспакойная думка: што, калі б ўсё пайшло па сцэнарыі, які падрыхтавалі і спрабавалі рэалізаваць у нашай краіне «добразычліўцы» па той бок мяжы? Якім быў бы жнівень 2022 года – мірны, працавіты і шчодры, як цяпер, ці… Пра гэта не хочацца нават думаць. Можна толькі ўявіць, у якой яме рызыкавала апынуцца
Беларусь. І ці змагла б яна захаваць для сваіх грамадзян, апроч іншага, галоўную каштоўнасць – мір і бяспеку на роднай зямлі.
Пытанні, пытанні… Сярод іншага раз-пораз мы ўсё ж звяртаемся і да жніўня 2020 года. Чаму, спытаеце? Адказ навідавоку: нам больш не патрэбны ўзрушэнні накшталт таго, што перажылі два гады таму. Бо гэта не «проста палітыка», як нехта спрабуе пераканаць. Гэта быў замах на наша з вамі жыццё, на будучыню Радзімы – гнюсны і подлы. На шчасце, ён з трэскам праваліўся. Але гэта не значыць, што бяду і небяспеку назаўсёды адвадзілі ад Беларусі. Не, яна зусім побач. Рэваншысты не дрэмлюць, хаця іх высілкі вартыя жалю і нічога, акрамя неўразумення і гідлівасці, не выклікаюць.
Гордая пазіцыя нашай краіны, якая не скарылася пад нябачаным санкцыйным прэсам і, наадварот, дэманструе зайздросную жыццёвую сілу, прымушае ворагаў скрыгатаць зубамі ад злосці і выдумляць новыя захады супраць Беларусі. Таму сітуацыя вельмі складаная. Пра гэта гаварыў Прэзідэнт Аляксандр Лукашэнка на нядаўнім пасяджэнні Савета Міністраў. Асабліва падкрэсліў кіраўнік дзяржавы, што пытанне нумар адзін дня сённяшняга – функцыянаванне эканомікі. Гэта фактар нацыянальнай бяспекі. Напружвацца трэба на кожным працоўным месцы. Іншага выйсця ў нас няма. Ніхто не дасць нам паратунку. Толькі самі – адзінай, згуртаванай краінай – пераадолеем усе выклікі неспакойнага, віхурнага часу. Як і тады, два гады таму.