Ад нацыянальнага да міжнароднага

XXVI Дзень беларускага пісьменства маштабна разгорнецца ў Слоніме ўжо ў гэтыя выхадныя дні. Гасцей мерапрыемства чакае шмат цікавага: зубр з дэталяў машынак і шрыфтоў, квэст-гульня “Код Сапегі”, двор з сапраўдным друкарскім станком, паштовыя маркі з дапоўненай рэальнасцю.

Праграма мерапрыемстваў займае не адну друкаваную старонку, месцам правядзення якіх стане не адзін квартал горада. Сёння гэта сапраўды вялікае свята. Але цікава ўспомніць, як усё пачыналася.

Упершыню Дзень беларускага пісьменства прайшоў у 1994 г. на радзіме галоўнай персоны кнігадрукавання Францыска Скарыны. Полацк нездарма першым ушанаваў адзінства друкаванага слова з гісторыяй і культурай народа. Тут утварылася першая беларуская дзяржава. Тут нарадзіўся першы князь-кніжнік. Тут знойдзены старажытныя кнігі. Адсюль пачалося пісьменства.

Як адзначыў Прэзідэнт Беларусі Аляксандр Лукашэнка, Дзень беларускага пісьменства – гэта сапраўдны сімвал незалежнай Беларусі. Таму што дзякуючы гэтай з’яве ўвесь свет ведае Францыска Скарыну і Міколу Гусоўскага, Сымона Буднага і братоў Мамонічаў. З імі мы стваралі сваю гісторыю і даказвалі, што можам існаваць як самадастатковая дзяржава.

Мерапрыемства таму і праходзіць у гарадах-цэнтрах культуры, навукі, літаратуры і кнігадрукавання, каб яшчэ раз падкрэсліць важнасць гістарычных каштоўнасцей. Эстафету святкавання ўпадабанага нацыянальнага свята ў розныя гады пераймалі Тураў (двойчы), Навагрудак, Нясвіж, Орша, Пінск, Заслаўе (двойчы), Мсціслаў, Мір, Камянец, Паставы, Шклоў, Барысаў, Смаргонь, Хойнікі, Ганцавічы, Глыбокае, Быхаў, Шчучын, Рагачоў, Іванава. Сёння ганаровае права атрымаў горад Слонім.

З 1998 г. Дзень беларускага пісьменства святкуецца ў першую нядзелю верасня, што замацаваў Указ Прэзідэнта Рэспублікі Беларусь “Аб дзяржаўных святах, святочных днях і памятных датах у Рэспубліцы Беларусь”.

(Заканчэнне на 4-й стар.)