Ад нацыянальнага да міжнароднага
(Заканчэнне. Пачатак на 1-й стар.)
Гэты год – асаблівы. Менавіта ў 2019 годзе Дзень беларускага пісьменства выпаў на Свята ведаў, чым і нагадаў непарушную сувязь пісьменства, інфармацыі і адукацыі.
Дзень беларускага пісьменства – гэта не проста “свята дзеля свята”, гэта магчымасць для гарадоў атрымаць новы імпульс у развіцці. Напярэдадні пачынаецца рэканструкцыя будынкаў, вуліц і плошчаў, аднаўляецца жыллёвы фонд, з’яўляюцца новыя аб’екты сацыяльнакультурнай сферы.
За прыкладамі далёка ісці не трэба – сёлета ў Слоніме добраўпарадкавалі набярэжную канала Агінскага, аднавіўся пасля рэканструкцыі будынак гасцініцы “Шчара”, адкрываюцца помнік Сапегу і кніжная крама
“Санет”. Адным словам, горад стаў гасцінным і для жыхароў, і для гасцей.
Тэрыторыю свята падзеляць на тэматычныя пляцоўкі: літаратурную, мастацкую, навуковую, турыстычную, спартыўную, рэлігійную. Кожная прапаноўвае шэраг актыўнасцей, якія варта наведаць гасцям свята.
Так, для аматараў літаратуры цікавымі будуць “Коласаўскія чытанні” і круглы стол беларускіх і замежных літаратараў
“Мастацкая літаратура як шлях адзін да аднаго”.
У дадатак да шматлікіх выстаў прапануюць пазнаёміцца з праектам VKL3D, які створаны на стыку мастацтва і інфармацыйных тэхналогій.
Навукоўцы, краязнаўцы, настаўнікі і вучні школ прымуць удзел у канферэнцыі “Слонімскія чытанні”, якая ўключае тэмы тапанімікі, дыялектаў, творчасці мясцовых жыхароў.
У межах святкавання Дня пісьменства плануецца стварыць Сад Малітвы каля Свята-Успенскага Жыровіцкага манастыра, а ўсіх ахвотных запрашаюць на Божую Літургію ў Слоніме і духоўнаасветніцкую канферэнцыю ў Жыровічах.
Прадстаўнікі сферы турызма падрыхтавалі каля 15 аглядных экскурсій па гораду і акрузе. Са сталіцы нават прывязуць мабільны музей акіяна, які можна будзе знайсці на вуліцах горада.
Найбольш актыўныя і спартыўныя, безумоўна, збяруцца побач з тэматычнымі мерапрыемствамі. У Слоніме ў гэтыя выхадныя будзе даволі насычаная праграма спаборніцтваў: з каноэ і байдаркамі, шахматамі і шашкамі, боксам і гімнастыкай, гандболам і звычайным футболам.
Як горад-арганізатар Слонім стаў цэнтрам прыцягнення ўвагі: фізічна – на адзін дзень, рэальна – на цэлы год. І не толькі жыхароў нашай краіны.
Гасцямі мерапрыемства становяцца айчынныя і замежныя літаратары, журналісты, выдаўцы, выканаўцы і творчыя калектывы. Таму свята беларускага пісьменства сёння - свята міжнароднае.