Завяршыўся навучальны год
30 мая ва ўстановах адукацыі Бераставіцкага раёна завяршаецца чарговы навучальны год. Сёлетняя эпідэміялагічная абстаноўка не дазволіла адзначыць яго традыцыйнымі ўрачыстымі лінейкамі, з падвядзеннем вынікаў года і ўзнагароджаннем лепшых вучняў.
- Свята апошняга званка ў гэтым годзе было вырашана не праводзіць, - гаворыць намеснік начальніка аддзела адукацыі Бераставіцкага райвыканкама Святлана Сунэлік. - Вынікі 2019-2020 навучальнага года падведзены на класных гадзінах, якія прайшлі 29 і 30 мая. Навучальны год завяршыўся для 1552 бераставіцкіх школьнікаў, у гэтым годзе сцены ўстаноў адукацыі раёна пакіне 71 адзінаццацікласнік, базавую школу заканчваюць 133 вучні дзявятых класаў. Прыемна адзначыць, што сярод выпускнікоў сярэдняй школы трое адзінаццацікласнікаў прэтэндуюць на атрыманне атэстата асобага ўзору з узнагароджаннем залатым медалём, а сярод выпускнікоў базавай школы ёсць дзесяць прэтэндэнтаў на атрыманне пасведчання з адзнакай, ім застаецца пацвердзіць свае веды на выпускных экзаменах.
Дарэчы, экзамены ва ўстановах адукацыі раёна пройдуць з 1 па 9 чэрвеня. Выпускнікі адзінаццатых класаў будуць здаваць чатыры экзамены: па матэматыцы, рускай або беларускай мове, замежнай мове і гісторыі Беларусі. Дзевяцікласнікаў, у сваю чаргу, чакаюць тры экзамены: па рускай, беларускай мовах і матэматыцы. Акрамя таго, выпускнікі 11 класаў, якія асвойвалі адукацыйную праграму прафесійнай падрыхтоўкі рабочых у рамках вучэбнага прадмета «Працоўнае навучанне», па жаданні змогуць здаць кваліфікацыйны экзамен, і пры ўмове яго паспяховай здачы атрымаюць пасведчанне ўстаноўленага ўзору аб прысваенні кваліфікацыйнага разраду па прафесіі «швачка» і «слесар па рамонце аўтамабіляў».
Святлана Віктараўна адзначыла, што ўручэнне атэстатаў выпускнікам запланавана на 10 чэрвеня, раённага свята з гэтай нагоды па зразумелых прычынах не будзе, установам адукацыі рэкамендавана ўручыць атэстаты на лінейках, пажадана на свежым паветры.
Ірына МІКЛАШ