Старадварэцкая Сёмуха
Фальклорнае свята “Старадварэцкая Сёмуха гудзе на ўсю ваколіцу” прайшло ў нядзелю, 20 чэрвеня, у аграгарадку Стары Дворац. Жыхары аграгарадка, а таксама госці з суседніх населеных пунктаў змаглі далучыцца да святкавання аднаго з галоўных праваслаўных святаў – Дня Святой Тройцы.
Тройца – гэта свята жыцця, якое з’яўляецца выдатным прыкладам адраджэння даўніх народных абрадаў і традыцый. Адзначаецца яно на пяцідзясяты дзень пасля Вялікадня, адсюль і назва – Сёмуха.
Ужо па добрай традыцыі работнікі філіяла па культурнадасугавай дзейнасці аг. Стары Дворац пры падтрымцы сельгаспрадпрыемства – аграфірмы “Стары Дворац” праводзяць гэтае прыгожае свята фальклору і народнай песні, прапаноўваючы ўдзельнікам мерапрыемства дакрануцца да традыцый нашых продкаў, пазнаёміцца з творчасцю вакальных калектываў Гродзенскай вобласці і, канешне, павесяліцца ад ўсёй душы, прымаючы ўдзел у прапанаваных гульнях.
У форме невялікіх тэатралізаваных замалёвак, якія прадэманстравалі ўдзельнікі фальклорнага аматарскага аб’яднання “Дударочкі” і дзіцячага аматарскага аб’яднання “Старадварэцкія пацехі”, адбылося знаёмства з асноўнымі абрадамі ў святкаванні Сёмухі – “завіваннем” бярозкі, “кумленнем” і “ваджэннем куста”.
Канцэртную праграму склалі нумары лепшых калектываў мастацкай творчасці. Сёлета ўдзельнікаў свята сваёй творчасцю парадавалі народны сямейны ансамбль “Сваякі”, народны фальклорны ансамбль “Жывіца”, народны ансамбль “Бераставіцкія музыкі”, вакальны калектыў “Вечарына” і трыо “Верацейцы”.
Таксама падчас святкавання старадварэцкай Сёмухі ўдзельнікаў мерапрыемства частавалі прысмакамі, дзейнічалі выставыпродажы вырабаў дэкаратыўнапрыкладной творчасці, працавалі дзіцячыя атракцыёны, якія карысталіся вялікім попытам у дзетак.
Аднак галоўным сюрпрызам для маленькіх гасцей мерапрыемства стаў водны фантан, які падрыхтавалі супрацоўнікі Бераставіцкага РАНС.
Сённяшняе гарачае сонца яшчэ раз пацвярджае, што лета ўжо афіцыйна ўступіла ў свае правы. Святкаваннем Сёмухі жыхары і госці аг. Стары Дворац з усмешкамі на тварах і добрымі пачуццямі развіталіся з вясной і ўсе разам загадалі здабыць як мага больш здароўя, кахання і шчасця.