“Гуляюць дзеці, гуляем мы”
Падчас святкавання фестывалякірмашу працоўнікаў вескі на тэрыторыі летняга амфітеатру дзейнічала дзіцячая пляцоўка «Гуляюць дзеці, гуляем мы». Праграма пляцоўкі прадугледжвала разнастайныя мерапрыемствы: канцэрт «Залатая ніва талентаў дзіцячых», забаўляльныя ігры, шоў мыльных пузыроў, магічнае выступленне ілюзіяніста, выступленне ваеннага аркестра Гродзенскай пагранічнай групы, тэатра роставых лялек, выставу мастацкай творчасці дзіцячай школы мастацтваў і яе філіялаў, аквагрым, майстар-класы па вырабе мяккай цацкі і лепкі з пластычнага цеста ад цэнтра творчасці дзяцей і моладзі і раённай бібліятэкі.
На працягу дня тут працавалі шматлікія атракцыёны і батуты, гандлёвыя кропкі рамеснікаў і фудтракі.
Галоўным момантам дзіцячай пляцоўкі стала ўрачыстае ўзнагароджанне Граматамі Галоўнага ўпраўлення адукацыі Гродзенскага аблвыканкама лепшых работнікаў сельскагаспадарчых каледжаў вобласці. У цырымоніі ўзнагароджання ўдзел прыняў Руслан Абрамчык, начальнік Галоўнага ўпраўлення адукацыі Гродзенскага аблвыканкама.
Двойчы на сцэну падымаліся прадстаўнікі Бераставіцкага раёна. Аляксандр Пасько і Ігар Вяргейчык, майстры працоўнага навучання Бераставіцкага дзяржаўнага каледжа, узнагароджаны граматай Галоўнага ўпраўлення адукацыі Гродзенскага абласнога выканаўчага камітэта за шматгадовую плённую працу ў сістэме прафесійнай адукацыі, дасягнутыя поспехі ў навучанні і выхаванні падрастаючага пакалення і высокія паказчыкі ў працы падчас уборачнай кампаніі 2022 года.
***
На гарадскім стадыене с самага ранку разгарнулася выставапаказ сельскагаспадарчай тэхнікі «Аграсалон». Найбуйнейшыя вытворцы сельгасабсталявання прадставілі ўвазе гасцей свята сваю прадукцыю. ААТ «Мінскі трактарны завод», ААТ «Смаргонскі агрэгатны завод», ААТ «АМКАДОР» ККХ», ААТ «ГОМСЕЛЬМАШ», ААТ «ККХ «Бабруйскаграмаш», ААТ «ККХ «ГродноОблсельхозтехника», ДЛГУ «Ваўкавыскі лясгас» выставілі больш за 30 адзінак тэхнікі. Трактары «Беларус» розных мадэляў, міні-трактары, мотаблокі, збожжаўборачныя камбайны, кормараздатчык... Разнастайнасць машын выклікала непрыхаванае захапленне ў дзяцей і дарослых.
***
Для моладзі рэгіёну праводзіліся спартыўныя спаборніцтвы «Вясковая эстафета». Арганізатарам мерапрыемства выступіў Гродзенскі абласны камітэт ГА «Беларускі рэспубліканскі саюз моладзі”.
Праграма эстафеты ўключала некалькі відаў спаборніцтваў. Галоўная іх асаблівасць у тым, што ўдзельнікі выкарыстоўвалі сельскагаспадарчую прадукцыю як інвентар. Каб стаць самым трапным у конкурсах «Аграрны баскетбол» і «Яблычны снайпер» трэба было трапіць бульбай у вядро і дроцікамі для гульні ў «дартс» у яблык максімальна магчымую колькасць разоў. Не толькі хуткім, але і спрытным трэба было быць у забегах з ухопам і чыгуном з печы. Для выканання папулярнай кампазіцыі ў спаборніцтве «Сельскі аркестр» удзельнікам спатрэбіліся вёдры, пілы, лыжкі і іншыя сельскагаспадарчыя прыстасаванні. Адзін з самых вясёлых і адначасова складаных конкурсаў - «Беларускія пінгвіны», у якім каманды пераносілі качаны капусты, заціснуўшы іх паміж ног.
Нестандартныя конкурсы падымалі настрой і гледачам, і ўдзельнікам.
Усе каманды адзначаны дыпломамі за ўдзел. Пераможцы вызначаліся як ў кожным асобным конкурсе, так і ў агульнакамандным заліку.
Па выніках усіх спаборніцтваў на 3 месцы апынулася каманда Астравецкага раёна. 2 месца заняў Гродзенскі раён. Пераможца «Сельскай эстафеты» - Ваўкавыскі раён.
Прызёры спаборніцтва ўзнагароджаны каштоўнымі падарункамі – сельскагаспадарчай прадукцыяй.
***
У скверы 500-годдзя г.п. Б. Бераставіца адбыўся сапраўдны восеньскі карагод выстаў і інтэрактыўных пляцовак. Установы сацыяльнай абароны насельніцтва Гродзенскай вобласці, дзяржаўныя каледжы, Гродзенскае абласное ўпраўленне Дэпартамента аховы МУС, чацвёрты асобны спецыяльны міліцэйскі батальён, Гродзенская абласная арганізацыя АСВОД і іншыя прадпрыемствы прадставілі прэзентацыю сваёй дзейнасці, прадукцыі і абсталявання.