Вітае шчыра Рагачоў
Гомельшчына прымае 23-ці Дзень беларускага пісьменства. Сталіца яго — Рагачоў.
Фактычна распачнецца свята рэспубліканскай навукова-асветніцкай экспедыцыяй “Дарога да святыняў” з Благадатным агнём ад Гроба Гасподняга 31 жніўня ад Свята-Духава кафедральнага сабора ў Мінску. Шлях прадоўжыцца праз населеныя пункты Баранавіцкага і Салігорскага раёнаў. Маршрут Благадатнага агню па Гомельшчыне плануецца праз вёску Чырвоная Слабада Акцябрскага, г. п. Азарычы Калінкавіцкага раёнаў, Гомель, г. п. Парычы Светлагорскага раёна, Светлагорск, Жлобін і, вядома ж, Рагачоў.
3-га верасня ў рагачоўскім гарадскім Доме культуры ў 12.00 пачнуцца “Рагачоўскія чытанні”, у якіх возьмуць удзел навукоўцы, пісьменнікі. Шматлікія выставы адметных кніжных выданняў чакаюць вас ў Доме кнігі. У дзіцячай школе мастацтваў Рагачова пройдуць 3-я Міжнародныя Капланаўскія чытанні, праводзіцца шэраг выстаў мастакоў і пісьменнікаў-класікаў. У Рагачоўскім музеі народнай славы можна будзе пабачыць сапраўдныя работы Анатоля Каплана. У аграгарадку Журавічы ўдзельнікі міжнароднага літаратурнага свята “На зямлі Макаёнка” правядуць мітынг памяці народнага пісьменніка Беларусі.
Цэнтральныя падзеі свята ў сталіцы 23-га Дня беларускага пісьменства пройдуць 4 верасня. Распачнуцца яны пасадкай сада малітвы ў Рагачове, хрэсным ходам да храма Святога Благавернага князя Аляксандра Неўскага, пасадкай пісьменніцкай алеі, прысвечанай 10-годдзю творчага саюза.
Апоўдні — урачыстае адкрыццё Дня беларускага пісьменства, мастацка-тэатралізаваная дзея “Беларусь — спрадвечная песня” на галоўнай сцэнічнай пляцоўцы. Потым — уручэнне Нацыянальнай літаратурнай прэміі. У 14.00 адбудзецца ўрачыстае адкрыццё Дома кнігі ў Рагачове і кнігарні “Першацвет”. Прэмію Гомельскага аблвыканкама “Літаратурная прэмія імя Кірылы Тураўскага” пераможцы таксама атрымаюць на свяце. Уганаруюць і пераможцаў рэспубліканскага конкурсу “Золотое перо “Белой Руси — 2016”.
У павільёнах на вуліцы Леніна можна будзе азнаёміцца з сучаснай беларускай кнігай і прэсай Беларусі, прыдбаць любімыя выданні, пабываць на адметнай выставе-прэзентацыі турыстычнага патэнцыялу Беларусі і турыстычных паслуг “Гомельшчына турыстычная” і шматлікіх іншых.