Радок да радка, старонка да старонкі
За пяць гадоў дзейнасці выдавецкім домам “Гомельская праўда” надрукавана больш за 70 выданняў
Сярод іх кнігі, прысвечаныя юбілейным датам прадпрыемстваў, тэматычныя фотаальбомыпрэзентацыі нашага рэгіёну, творы гомельскіх літаратараў, іншыя віды паліграфічнай прадукцыі.
Многія кнігі шырока вядомыя не толькі жыхарам вобласці, але і іншых рэгіёнаў Беларусі і замежжа. Да прыкладу, фотаальбом “Гомельшчына ўнікальная”, надрукаваны на беларускай, рускай і англійскай мовах. Гэта маляўнічая прэзентацыя Гомельскай зямлі з’яўляецца выдатным падарункам з нагоды знамянальных дат, сувенірам для дзелавых партнёраў, замежных гасцей.
Да 70-годдзя Перамогі ў Вялікай Айчыннай вайне выдавецкі дом “Гомельская праўда” надрукаваў кнігу “Никогда не забудем”. Яна змяшчае гістарычныя матэрыялы і фотадакументы, звязаныя з Гомельскай вобласцю, і стала сапраўдным дапаможнікам для ўсіх, хто цікавіцца гісторыяй роднага краю і шануе подзвіг народа ў Вялікай Айчыннай вайне.
Адно з апошніх выданняў — фотаальбом “Гомельщина. Жизнь после Чернобыля”, у якім сабраны ўнікальныя дакументы і фотаздымкі з розных архіваў, у тым ліку асабістых і сямейных, аб пераадоленні самай страшнай тэхнагеннай катастрофы XX стагоддзя. На старонках альбома адлюстраваны першыя дні пасля аварыі, мужнасць ліквідатараў, горыч тысяч перасяленцаў, дух нашага народа, які знайшоў у сабе сілы згуртавацца і жыць далей, адраджаючы зраненую “мірным атамам” зямлю продкаў.
У “Гомельскай праўдзе” працуюць прафесійныя журналісты, фатографы, дызайнеры, стыльрэдактары. Супрацоўніцтва з друкарнямі, якія маюць сучаснае абсталяванне, дазваляе атрымліваць нязменна высокую якасць паліграфічнай прадукцыі.
Цікавая навіна: адзін экзэмпляр альбома “Гомельшчына ўнікальная” цяпер знаходзіцца ў Еўрапейскім падраздзяленні бібліятэкі Кангрэсу ЗША. Яго перадала амерыканскім калегам дырэктар Гомельскай абласной універсальнай бібліятэкі імя У. І. Леніна Марына Рафеева падчас знаёмства з вопытам іх работы. Дададзім, што бібліятэка Кангрэсу — буйнейшая ў свеце: у ёй звыш 130 мільёнаў адзінак захоўвання, агульная даўжыня кніжных паліц складае амаль 850 кіламетраў. Спадзяемся, наша кніга зойме на іх дастойнае месца.