Дзень праваслаўнай кнігі ў храме мудрасці
Дзень праваслаўнай кнігі ў бібліятэках Гомельшчыны прайшоў пад знакам 500-годдзя Францыска Скарыны. Удзел у урачыстасцях браў уладыка Стэфан — епіскап Гомельскі і Жлобінскі.
У абласной універсальнай бібліятэцы імя Леніна юныя чытачы з задавальненнем далучыліся да інтэрактыўнай гісторыі — гістарычнага квэста “Храм мудрасці: учора, сёння, заўтра”. Рабяты здзейснілі падарожжа па кніжнай скарбонцы (прайшлі маршрутамі ад музея рэдкай кнігі да аддзела інфармацыйных тэхналогій), сустрэліся з першадрукаром Скарынам, канцлерам Расійскай імперыі Бястужавым і шматлікімі іншымі асобамі, каб скласці запаветны выраз пра любімую Ленінку. Пераможцы квэста атрымалі дыпломы ад уладыкі Стэфана, пачулі яго развагі пра значэнне друкаванага слова ў жыцці кожнага з нас.
У холе бібліятэкі быў адкрыты “Горад майстроў і кнігадрукароў эпохі Францыска Скарыны”. На кніжнай выставе можна было здзейсніць падарожжа на 500 гадоў назад з дапамогай шматтомнага факсімільнага рарытэту, выдадзенага Нацыянальнай бібліятэкай Рэспублікі Беларусь да юбілею беларускага кнігадрукавання. Была прадстаўлена і ўнікальная Біблія — трохтомнік, выдадзены ў Санкт-Пецярбургу ў 1888 годзе з ілюстрацыямі Густава Дарэ, прычым тыражом усяго 100 экзэмпляраў.
Абласная ўніверсальная бібліятэка за сваю работу на ніве духоўнага адраджэння ўзнагароджана Архірэйскай граматай.
Старшыня абласнога аддзялення Саюза пісьменнікаў Беларусі Уладзімір Гаўрыловіч даў старт традыцыйнаму творчаму конкурсу “Праваслаўе — мая надзея”, заснаванаму сумесна з Гомельскай епархіяй. Ён працягнецца да 5 верасня.