Добрая памяць

Яе пакінула землякам і берасцейцам ураджэнка вёскі Струкачоў Кармянскага раёна Марыя Каржова.

На жаль, Марыя Тарасаўна не дачакалася выхаду ў свет сваёй кнігі “Ад Брэста да Уладзівастока”, прычым літаральна некалькі дзён. Рыхтаваць выданне ёй дапамагаў берасцейскі пісьменнік-дакументаліст, паэт Мікола Панасюк.

“Лапці дзеда Яфіма”, “Сустракала родная школа”, “На карэльскай зямлі” — у кожнага раздзела кнігі (а іх багата) свая назва. Марыя Каржова распавядае пра жыццё на Гомельшчыне і ў карэльскім горадзе Сартавале, запрашае ў атмасферу шматабяцаючага калгаснага ладу жыцця, якое толькі зараджалася, арганізоўвалася, да якога прывыкалі, у якім вучыліся жыць і працаваць аднавяскоўцы, родныя і аднагодкі аўтаркі. Чытаючы іх, сапраўды акунаешся ў даўнія 30-я, пачатак 40-х гадоў XX стагоддзя...

Кніга “Ад Брэста да Уладзівастока” — збор па-мастацку напісаных успамінаў, кніга-хроніка нашага чалавека-сучасніка аб незабыўным. А яшчэ гэта люстэрка душы аўтара, якая, на жаль, раптоўна зляцела на 87-м годзе жыцця. Марыя Тарасаўна праз усё жыццё пранесла ў сваім сэрцы любоў да маленькай радзімы, роднай вёсачкі Струкачоў. Яна пакінула добры і глыбокі след свайму роду, землякам і наступнікам.