Пакуль жыву, тварыць дабро не перастану
У абласной універсальнай бібліятэцы імя Леніна адбылася прэзентацыя твораў-пераможцаў абласной літаратурнай прэміі імя Кірылы Тураўскага.
Урачыстая цырымонія ўганаравання аўтараў-лаўрэатаў адбылася раней у Палацы Румянцавых і Паскевічаў. Зараз у галоўнай бібліятэцы рэгіёна прадставілі кнігі “Первая весна” Аляксандра Джада, “На досвітку” Юльяны Пятрэнка, “І тут жывуць людзі” Раісы Дзейкун, “Перо кукушки” Аляксандра Атрушкевіча, “Три волшебницы” Анатоля Караленкі, якія выдадзены на сродкі, выдаткаваныя аблвыканкамам. Выданні занялі пачэснае месца ў Ленінцы на выставе “Гомельскі мерыдыян літаратуры”.
Аўтары пастараліся прадставіць свае работы чытачам, студэнтамфілолагам: чыталі вершы, урыўкі прозы. Атрымалі яны і музычнае віншаванне ад Наталлі Шэмет.
Сімвалічна, што кожная з кнігпераможцаў мае самае непасрэднае дачыненне да малой радзімы. Напрыклад, Аляксандр Атрушкевіч сваімі паэтычнымі творамі перадае свае пачуцці да роднага Гомеля, у якім нарадзіўся і вырас. Раіса Дзейкун словам публіцыста распавядае пра родную станцыю Аўрамаўская на Хойнікшчыне і перажытае землякамі пасля катастрофы на ЧАЭС, Юльяна Пятрэнка ўзнаўляе бабуліны легенды і паданні роднай Добрушчыны... Шчыра прывітаў усіх старшыня абласнога аддзялення Саюза пісьменнікаў Беларусі Уладзімір Гаўрыловіч. Ён зазначыў, што на Гомельшчыне здавён існуе літаратурная традыцыя і трэба, каб яна захоўвалася.
Літаратары наведалі мемарыяльную залу ў бібліятэцы, прысвечаную народнаму пісьменніку Беларусі драматургу Андрэю Макаёнку. Выдатны экскурс у жыццё і творчасць славутага земляка зрабіла для гасцей адна з руплівіц стварэння гэтай скарбонкі ў Ленінцы Ніна Серыкава, якая падтрымліве стасункі з раднёй творцы. Пісьменнікі Гомельшчыны перадалі ў мемарыяльную залу шэраг фатаграфій Макаёнка і яго асабістую папку, у якой ён насіў рукапісы твораў.