Дрэва мацуе каханне
ЛОЕЎ. На маляўнічым высокім беразе каля гарадскога цэнтра культуры «вырасла» дрэва кахання.
Выраблена яно з жалеза цудоўным майстрам-кавалём Алегам Жыліцкім, які, дарэчы, па асноўнай сваёй прафесіі ўрач. Дапамогу яму ва ўстаноўцы ўнікальнага аб’екта аказалі дэпутат райсавета Дзмітрый Гаўрылькоў і работнікі райжылкамгаса. Гэта своеасаблівы падарунак да юбілею – 515-годдзя роднага Лоева, які адзначым у кастрычніку, сказала старшыня раённага Савета дэпутатаў Ірына Пастухова пры віншаванні каля дрэва-сімвала новай сям’і лаяўчан Ганны і Аляксандра Іванюценка. Няхай жа іх шлюб будзе ўсе гады азораны каханнем!