Збор малака і ліквідацыя наступстваў урагану

Учора губернатар Іван Крупко правёў у Петрыкаве прамую лінію і прыём грамадзян

Пытанні, з якімі да старшыні аблвыканкама звярнуліся жыхары Гомельшчыны, былі самымі разнастайнымі.

Жыхарка Жыткавіцкага раёна скардзілася: па сённяшні дзень не ліквідаваны наступствы ўрагану на тэрыторыі яе домаўладання: «Вецер сарваў дах на хаце, на адрыне, паламаў агароджу». Нюанс у тым, што жанчына жыве ў бацькоўскай хаце, але пры гэтым не ўступіла ў спадчыну. Зразумела, што фінансаванне рамонтных работ за кошт дзяржавы пад пытаннем, аднак сам-насам з праблемай заяўніцу не пакінуць. Па даручэнні губернатара да жанчыны выедуць адказныя раённыя службы і вызначаць, чым дапамагчы.

Узняла пытанне здачы малака ад гаспадароў прыватных падворкаў жыхарка Чачэршчыны: «Грамадскі статак у населеным пункце налічвае каля сотні кароў.

Заўсёды здавалі малако на МТФ. 240 тон толькі за мінулы год! Пасля аб’яднання сельгаспрадпрыемстваў раёна зборам малака ад насельніцтва сталі займацца прыватныя структуры – узніклі цяжкасці». Іван Крупко паабяцаў арганізаваць працэс з улікам інтарэсаў людзей. «Літаральна на працягу некалькіх дзён будзе прынята рашэнне. Ёсць дзяржаўныя малочныя заводы, ёсць сельскі Савет, вывучым магчымасці вашага раёна. Малако – запатрабаваны сёння прадукт», – пазначыў губернатар.

Жыхарка Кашэвічаў звярнулася з праблемай неналежнага добраўпарадкавання аграгарадка. Старшыня аблвыканкама зазначыў: спецыялісты абследуюць дарогі і ўжо ў панядзелак сітуацыю разгледзяць на нарадзе.

Пытанне прыватызацыі прывяло на прыём сямейную пару з Жыткавічаў. У канцы 1980-х гадоў арганізацыя, дзе на той момант працаваў гаспадар, набыла дом для сям’і. З заявай аб прыватызацыі звярнуліся літаральна за тыдзень да заканчэння працэсу. Аднак поўны пакет дакументаў сабраць не атрымалася па аб’ектыўных прычынах. Ускладняў сітуацыю той факт, што жыллё пераходзіла з рэспубліканскай формы ўласнасці ў раённую. Да таго ж на тэрыторыі домаўладання за час пражывання з’явіліся новыя гаспадарчыя пабудовы, якіх, зразумела, у першапачатковым плане не было. Цяпер дом на балансе ЖКГ. Адказным асобам губернатар паставіў задачу прапісаць дакладны алгарытм дзеянняў заяўнікам і мясцовым службам.

У межах візіту на Петрыкаўшчыну губернатар наведаў ЦРБ і ацаніў гатоўнасць акушэрска-гінекалагічнага корпуса пасля рэканструкцыі. У бліжэйшы час аб’ект будзе ўведзены ў эксплуатацыю.