Вёскі маёй паплавы
Зямлю са Свята-Троіцкай Аляксандра-Неўскай лаўры і магілы Ксеніі Пецярбургскай, а таксама іконкі з выявамі святых прывёз з культурнай расійскай сталіцы ў Рудню Жураўлёву ўраджэнец гэтай вёскі Аляксандр Радчанка. Напярэдадні Радаўніцы тут з’явілася мемарыяльная пліта з прозвішчамі 68 мірных жыхароў, ахвяр генацыду.
Жыхары Рудні Жураўлёвай, Лубенікаў, Каманоў, пасёлкаў Майскі і Рагазін (ад яго засталася толькі назва) Брагінскага раёна зноў сабраліся разам, каб ушанаваць памяць продкаў. Па закліку сэрца спяшаліся людзі ў сквер Памяці, дзе ўстаноўлены высокі драўляны крыж і капліца, пліты з прозвішчамі родных і блізкіх, суседзяў, якія загінулі ў гады ваеннага ліхалецця.
Да землякоў звярнуўся заслужаны міратворца Аляксандр Цярэшчанка. Менавіта па яго ініцыятыве і пры падтрымцы мясцовай улады з’явіліся ў Рудні Жураўлёвай і алея, і пліты. Значную дапамогу аказала і абласное аддзяленне Беларускага фонду міру. Вяскоўцы вельмі ўдзячны старшыні яго праўлення Цімафею Глушакову, якога заўсёды рады вітаць на сваёй малой радзіме. Дарэчы, гэта не ўсё, што запланавана зрабіць, таму збор сродкаў на ўвекавечванне памяці ахвяр вайны працягваецца. Магчыма, у наступны раз на малую радзіму прыедуць людзі з Украіны, жадаючых шмат.
Мерапрыемства праходзіла якраз у Свята працы 1 мая. Вяскоўцаў і гасцей цёпла павіншавалі намеснік старшыні райвыканкама Іна Міхаленка і старшыня Вуглоўскага сельскага Савета Святлана Протчанка. Доўгіх прамоў не было, гучалі словы вялікай павагі і любві, удзячнасці за працавітасць, цярплівасць, узаемаразуменне. Былы старшыня калгаса імя Чкалава Пётр Волкаў, які ўзначаліў гаспадарку ў 30-гадовым узросце, прызнаўся, што з такім калектывам можна было звярнуць горы. А калі напаткала чарнобыльская бяда, мясцовыя жыхары прымалі ў свае дамы па дзве-тры сям’і з зоны адсялення – з Пірак.
Аляксандр Радчанка, дзякуючы якому на драўляным крыжы з’явілася ікона Мікалая Цудатворца з італьянскага горада Бары, расказаў аб трагедыі сваёй сям’і: у гады вайны яна страціла 12 чалавек. Ксенія Пецярбургская не адзін раз адводзіла ад яго бяду, шчырая малітва да гэтай нябеснай заступніцы дапамагла пазбегнуць дарожнай аварыі і застацца ў жывых.
Дзяцей вайны віталі юныя міратворцы Вуглоўскага дзіцячага сада – сярэдняй школы і ўручылі ўсім сувеніры – папяровых галубоў. Протаіерэй Уладзімір Зелянкоўскі, настаяцель прыхода свяціцеля Мікалая Цудатворца ў Брагіне, асвяціў пліту, а Аляксандр Цярэшчанка адкрыў святочны канцэрт песняй «Вёскі маёй паплавы».
Загадчыца Лубяніцкага ФАПа Алена Туравец, прадавец магазіна № 24 Брагінскага філіяла абласнога спажывецкага таварыства Наталля Цярэшчанка, трактарыст-машыніст Лубяніцкага лясніцтва Камарынскага лясгаса Міхаіл Сяргеенка, ветэран паштовай сувязі Валянціна Мялешка, педагогі і ветэраны працы Лубяніцкай школы Ніна Свірыдзенка, Наталля Стрыбук і Аркадзь Купрыенка атрымалі лісты з падзякай і падарункі за добрасумленную працу ад раённага аб’яднання прафсаюзаў і раённай арганізацыі Беларускага прафсаюза работнікаў адукацыі і навукі.