Суддзі – служыцелі Феміды
Абавязак суддзяў – чэсна служыць законнасці, стаяць на абароне законных правоў і інтарэсаў чалавека. А гэта, безумоўна, прад’яўляе да іх асаблівыя маральныя, этычныя і прававыя патрабаванні. Калектыў суда Івацэвіцкага раёна – гэта 21 работнік – узначальвае вопытны кіраўнік і суддзя Аляксандр Іванавіч Кірыловіч, стаж работы суддзёй якога 19 гадоў. Суддзямі працуюць: 21 год – Васілій Сцяпанавіч Аўрусевіч, 17 гадоў – Сяргей Іванавіч Кухацкаволец і тры гады – Арцём Леанідавіч Падалянец.
На сённяшні дзень па вобласці колькасць злачынстваў скарацілася на 20 працэнтаў, аднак у суд Івацэвіцкага раёна паступае шмат аб’ёмных, шмат эпізодных спраў. Колькасць грамадзянскіх і адміністрацыйных спраў застаецца на тым жа ўзроўні, а гэта значыць, што за год судом Івацэвіцкага раёна разглядаецца прыкладна 1000-1200 грамадзянскіх спраў, адміністрацыйных да 2000 і крымінальных спраў – 350-400. Нагрузка на кожнага суддзю даволі значная, паколькі ў дзень іншы раз праходзіць да 10 пра- цэсаў розных відаў спраў. Практыкуецца таксама судом Івацэвіцкага раёна правядзенне выязных пасяджэнняў, на якіх разглядаюцца шматлікія матэрыялы Папраўчых устаноў №5 і №22.
Але ні ў якім разе нельга гаварыць пра тое, што якасць работы суда залежыць выключна ад суддзі. Вялікі ўклад у агульную справу ўносяць работнікі апарата суда, сакратары суда і судовых пасяджэнняў, многія з якіх зарэкамендавалі сябе граматнымі і дапытлівымі спецыялістамі. Яны, як і суддзі, рэгулярна павышаюць сваю кваліфікацыю.
Напярэдадні прафесійнага свята старшыня суда Івацэвіцкага раёна зычыў свайму калектыву і калегам моцнага здароўя, сямейнага дабрабыту і жыццёвага аптымізму ў высакароднай і адказнай справе служэння Закону. Аляксандр Кірыловіч віншаваў і адрасаваў шчырыя пажаданні здароўя і моцы духу былым старшыням і суддзям судоў, якія знаходзяцца на пенсіі, Аляксандру Міхайлавічу Вабішчэвічу і Васілію Дзмітрыевічу Вараб’ю.