Майстэрства цеплыні
Як у сучасным свеце, які запаланілі мас-маркеты, выглядаць арыгінальна? Адказ на гэта пытанне ведае майстрыха Любоў Каліноўская. Зараз у Івацэвіцкім гісторыка-краязнаўчым музеі дзейнічае персанальная выстаўка-продаж “Цёплая казка”, на якой прадстаўлены вязаныя рэчы, зробленыя таленавітымі рукамі Любові Вячаславаўны. Навуковы супрацоўнік ДУК “Івацэвіцкі гісторыка-краязнаўчы музей” Паліна Арцёмчык адзначыла, што ў Год малой радзімы музей працягвае знаёміць жыхароў з таленавітымі землякамі: мастакамі, паэтамі, майстрамі прыкладнога мастацтва. Прыгожая назва выстаўкі мае двайны сэнс. Як адзначыла Любоў Каліноўская, па-першае, рэчы, якія вяжуцца, нас саграваюць, а па-другое – утрымліваюць цяпло сэрцаў і думак майстроў, якія іх робяць. Адкрыццё выстаўкі, якое адбылося ў пачатку снежня, сабрала шмат прыхільнікаў вязання. Падчас адкрыцця ў наведвальнікаў была магчымасць пазнаёміцца з аўтарам рэчаў, палюбавацца прыгожымі і вытанчанымі сукенкамі, шапкамі, капялюшыкамі, швэдрамі, камізэлькамі, шалямі, сурвэткамі і набыць іх. І зразумець, што за кожнай рэччу – свая гісторыя.
Сама майстрыха расказала, што вязаннем займаецца больш за 10 гадоў і адзначыла, што ў апошнія гады вязанне стала модным. Наша сучаснае адзенне простае і, як правіла, аднатыпнае. Калі ў вашым гардэробе з'явіцца практычнае, звязанае спіцамі або кручком адзенне, вы можаце насіць яго і ў будні, і на адпачынку, і ва ўрачыстых выпадках. Вязаныя шаль, шалік, швэдар, капялюш, карункавае аздабленне, пояс і іншыя прадметы, дапаўняючы ансамбль вашага адзення, зробяць яго больш цікавым, прывабным. А для многіх жанчын захапленне вязаннем не толькі магчымасць стварыць нешта новае, арыгінальнае, але нярэдка пры сучасных тэмпах жыцця, гэта і патрэба ў адпачынку.
Убачыць на ўласныя вочы вязаныя рэчы, зробленыя з душой, і набыць іх можна па графіку работы музея да канца снежня.
Ганна ІЛЬЯШЭВІЧ.