У Беларусі ўзмоцнена дзяржпадтрымка дзяцей-сірот і шматдзетных сем'яў
У Беларусі прыняты дадатковыя меры па ўзмацненні дзяржаўнай падтрымкі дзяцей-сірот і шматдзетных сем'яў пры будаўніцтве, рэканструкцыі або набыцці жылля. На гэта накіраваны ўказы нумар 474 “Аб дзяржаўнай падтрымцы пры будаўніцтве (рэканструкцыі) або набыцці жылых памяшканняў” і нумар 473 “Аб долевым будаўніцтве”, якія Прэзідэнт Беларусі Аляксандр Лукашэнка падпісаў 10 снежня.
У адносінах да дзяцей-сірот памер субсідыі на пагашэнне асноўнага доўгу па камерцыйных крэдытах у адпаведнасці з указам нумар 240 павялічваецца з 35 працэнтаў да 50 працэнтаў. Для малазабяспечаных грамадзян, якія ажыццяўляюць будаўніцтва жылля і працоўную дзейнасць у населеных пунктах на тэрыторыі паўднёва-ўсходняга рэгіёна Магілёўскай вобласці, памер субсідыі на выплату часткі працэнтаў па камерцыйных крэдытах павялічваецца на 4 працэнтныя пункты. Акрамя таго, грамадзянам, якія выхоўваюць дзяцей-інвалідаў, прадастаўляецца права на атрыманне субсідыі на пагашэнне 50 працэнтаў асноўнага доўгу па камерцыйных крэдытах. Для шматдзетных сем'яў, якія выхоўваюць дзяцей-інвалідаў, устанаўліваецца першачарговае права на атрыманне дзяржаўнай падтрымкі. Таксама з 1 сакавіка 2019 года абмяжоўваецца права на атрыманне дзяржаўнай падтрымкі пры будаўніцтве (рэканструкцыі) або набыцці жылля для працаздольных грамадзян, не занятых у эканоміцы.