Навагоднія лялькі ў стылі "хэнд-мэйд"

Вырабы ручной работы, альбо як іх называюць “хэндмэйд”, у апошні час сталі вельмі папулярнымі. Зараз у магазінах можна набыць разнастайныя ёлачныя ўпрыгожванні і падарункі пад елку, але аматары эксклюзіву аддаюць перавагу менавіта "хэнд-мэйд" цацкам, бо ўпэўненыя, ручная праца – гэта гарантыя ўнікальнасці і непаўторнасці.

Кожны такі сувенір вырабляецца з душой, ён літаральна “нараджаецца” на свет, як жывая істота, бо ўмелец ўкладвае ў яго часцінку сваёй душы, тым самым “ажыўляючы” выраб. А ў доме, куды прынясуць такі сюрпрыз, назаўжды паселяцца ўтульнасць, мір і згода.

Такія рэчы, напоўненыя цеплынёй рук майстрых, ствараюцца ў аддзяленні дзённага знаходжання для грамадзян пажылога ўзросту Івацэвіцкага ТЦСАН у гуртку па інтарэсах “Сувенірная лаўка”. Жанчыны з

ювелірнай вытанчанасцю прадумваюць кожную дэталь будучай цацкі, і вось штрышок за штрышком яна набывае свой твар і свой характар.

Дзяды Марозы, Снягуркі, снегавічкі, ёлачкі і разнастайныя шары і ўпрыгожванні з сімвалам надыходзячага новага года свінні – цэлы навагодні “дэсант” высадзіўся на паліцах.

– Дзядоў Марозаў і Снягурачак ужо амаль не засталося, ўсіх прадалі, таму зараз працуем менавіта над гэтымі галоўнымі навагоднімі персанажамі, – адзначыла загадчыца ад- дзялення дзённага знаходжання для грамадзян пажылога ўзросту Святлана Аўрусевіч. – Глядзіце, якія яны прыгожыя, бярэш такую ў рукі і адчуваеш станоўчую энергетыку чалавека, які яе ствараў. Сапраўды, кожная наша цацка не падобная на іншую, і кожная абавязкова знойдзе гаспадара па сэрцы. Хутка ў нас з’явіцца новая партыя снегавічкоў, якія, упэўненая, прыйдуцца па душы і дарослым, і дзецям. "Хэнд-мэйд" цацкі можна набыць у сувенірнай лаўцы ў Івацэвіцкім цэнтры сацыяльнага абслугоўвання насельніцтва. Тут рабіць пакупкі яшчэ больш прыемна, бо напярэдадні свята кожны можа падарыць маленькі цуд іншаму – усе сродкі ад продажу ідуць на праекты, які арганізоўваюцца ў аддзяленні дзённага знаходжання для грамадзян пажылога ўзросту. Ганна ІЛЬЯШЭВІЧ, фота аўтара.