Любая тэхніка любіць клопат...
Як ужо паведамляў “ІВ”, завершаны раённы агляд-конкурс гатоўнасці рамонтна-абслугоўваючай базы сельгаспрадпрыемстваў Івацэвіцкага раёна да работы ў асенне-зімовы перыяд, пастаноўкі тэхнікі на захаванне, навядзення парадку на машынных дварах. Па выніках агляду вызначаны лепшыя гаспадаркі – тыя калектывы, дзе разумеюць, што немагчыма быць лепшым і ўвогуле паспяховым, калі не дбаеш пра захаванне тэхнікі і, зразумела, пра дзень заўтрашні. Супрацоўнік “ІВ” наведаў мехдвары трох сельгаспрадпрыемстваў, якія прызнаны лепшымі, каб упэўніцца: была іх перамога выпадковай ці не? ААТ “Перамога”
Сельгаспрадпрыемства з такой красамоўнай назвай і стала пераможцам раённага конкурсу. На мехдвары назіраецца парадак, адразу кідаецца ў вочы, што ў 2018-м годзе тут не толькі рамантавалі тэхніку, але і сачылі за тым, каб умовы працы ў персаналу мехмайстэрняў і механізатараў былі належнымі, паляпшаліся.
Зроблена сапраўды многа: будынак майстэрні сельгаспрадпрыемства доўгі час “пакутаваў”, бо працякаў дах, – як вынік, канструктыўныя элементы будынка разбураліся, не радавалі ўмовы працы зваршчыкаў, слесараў… Не дапамог і гідраізол. Таму кіраўніцтва “Перамогі” вырашыла “закрыць” праблему, як кажуць, раз і назаўсёды: купілі драўніну, правялі яе распіл, узнялі кроквы, зрабілі казыркі…
Над будынкам мехмайстэрні і над будынкам прахадной з’явіліся скатныя дахі – прыгожыя і эфектныя. Пачаліся фасадныя работы, якія, праўда, прыпыніла зіма.
І работы ў мехмайстэрні рамонтам даху не абмежаваліся. Ці прыходзіцца здзіўляцца, што менавіта “Перамога” стала лепшай у раённым конкурсе-аглядзе.
– У 2018-м годзе мы прынялі прынцыповае рашэнне: усю тэхніку сельгаспрадпрыемства захоўваць у адным месцы – на мехдвары ў Вульцы-Аброўскай, – расказвае Дзмітрый Грэчны, галоўны інжынер ААТ “Перамога”. – Раней частка тэхнікі захоўвалася ў Хадаках, але больш правільна, каб яна захоўвалася ў адным месцы, дзе сабраны і ўвесь персанал спецыялістаў… Дык вось, навялі парадак у пустуючым ангары, вычысцілі, адрамантавалі згодна з нормамі ДАСТа, паставілі новыя вароты – і будынак “зайграў”, усе камбайны зараз стаяць там…
Застаецца дадаць, што работы ў мехмайстэрні шырока вядуцца і цяпер, хаця да вясны ўсё ж такі далёка. Адрамантаваны балотныя плугі, дыскавыя бароны – яны ўжо гатовы да работы. Увогуле, парк тэхнікі ў сельгаспрадпрыемстве даволі вялікі, таму работы слесарам, зваршчыкам, кавалю хапае і сярод зімы. Ёсць графік правядзення рамонтных работ – і трэба яго вытрымліваць… Парадавала таксама, што ў дыспетчарскай цёпла, тут ззяе ялінка, бытавыя ўмовы добрыя, як і добры настрой у работнікаў гаспадаркі. Будынак мехмайстэрні ацяпляе паравы кацёл, калі маразы ўзмацняюцца, то ўключаюць і цеплагенератар, каб умовы для працы былі належнымі. ААТ “Квасевічы”
…Усе шэсць зернеўборачных камбайнаў ААТ “Квасевічы” стаяць у шчыльна зачыненым ангары
(на здымку). Роўненькія прыгажуны спакойна “зімуюць”, чакаючы часу, калі будуць праведзены рамонтныя работы, бо на кожны з іх заведзена дэфектная ведамасць, паступова набываюцца запчасткі… У першай палове 2019 года механізатары з ліку тых, хто замацаваны за кожнай адзінкай гэтай тэхнікі, і правядзе дадзеныя работы. Камбайн у дадзенай гаспадарцы – “птушка” важная, хаця некаторым з іх па 10-15 гадоў, а то і болей, але, дзякуючы беражлівасці, праслужаць яны яшчэ не адзін год. Можна не сумнявацца.
Тэхніка, агрэгаты і вузлы на мехдвары ў Квасевічах размешчаны пад навесамі з літаральна музейнай вытанчанасцю і акуратнасцю. "Гідам" для аўтара гэтых радкоў стаў Мікалай Ганчар, в. а. галоўнага інжынера ААТ “Квасевічы”. Кормаўборачныя камбайны, энерганасычаныя трактары, тэхніка для ўнясення ўгнаенняў, прэсы для корманарыхтоўкі, жняяркі, сеялкі, граблі і косы для корманарыхтоўкі, агрэгаты для апрацоўкі глебы – кожная адзінка тэхнікі дагледжаная і чакае свайго часу для работы, які наступіць, зразумела, вясной. На пляцоўцы пад адкрытым небам толькі плугі, але ДАСТ не забараняе захоўваць так. У боксах захоўваюцца грузавыя аўтамабілі – іх час прыйдзе ў летні перыяд.
Заканчэнне. Пачатак на 1-й стар.
У мехмайстэрні работнікаў нямнога – большасць слесараў, механізатараў і вадзіцеляў у адпачынку, за работу яны прымуцца ў другой палове зімы. Тут, дзякуючы рабоце цеплагенератара, не холадна. У цэлым, на мехдвары ў Квасевічах не адбылося значных змен, але адчуваецца, што тут шануюць тое, што ёсць. Пачалася работа па фарбаванні фасада ў больш стрыманы зялёны колер, запланаваны рамонт мыйкі, ужо забетанавана пляцоўка.
ААТ “Мічурынск”
2018 год стаў даволі плённым у справе захавання і добраўпарадкавання рамонтна-абслугоўваючай базы ААТ “Мічурынск”. Тут таксама адрамантавалі дах, як і ў ААТ “Перамога”, вароты абшылі металапрофілем і, увогуле, на кожным участку навялі парадак. Мехдвор прадпрыемства радуе вока, бо ён аздоблены і навагоднімі атрыбутамі свята – ялінкамі, гірляндамі. Як расказвае дырэктар сельгаспрадпрыемства Дзмітрый Бурчук, кожнае падраздзяленне “Мічурынска” атрымала віншаванні ад кіраўніцтва сельгаспрадпрыемства і Амяльнянскага СДК. Агульнае свята з’ядноўвае калектыў, дазваляе стаць яшчэ больш дружнай камандай.
Кідаецца ў вочы, што тут якасна правялі работу па пастаноўцы тэхнікі на зімовае захаванне, яна ўся на падстаўках, пафарбаваны рабочыя органы ў адпаведнасці з ДАСТам. “Мічурынск” у гэтым сэнсе прыемна здзіўляе, выйшаў, так бы мовіць, у першы эшалон лепшых гаспадарак. Такое стаўленне да тэхнікі, да работнікаў, канешне, акупіцца ў далейшым.
Уладзімір МІХАЛЕНКА, галоўны дзяржаўны інспектар Дзяржтэхнагляду ўпраўлення
па сельскай гаспадарцы і харчаванні райвыканкама,
Аляксандр ГОРБАЧ, “ІВ”.
Каментарый Уладзіміра МІХАЛЕНКІ, галоўнага дзяржаўнага інспектара Дзяржтэхнагляду ўпраўлення па сельскай гаспадарцы і харчаванні райвыканкама:
У апошнія два гады аўтатрактарны парк сельгаспрадпрыемстваў раёна абнавіўся значна. Вось лічбы: за 2017-2018 год у гаспадарках раёна з’явілася болей за 50 колавых трактароў (у асноўным, маркі “Беларусь”), пры тым, што ў папярэднія гады – адзінкі. Пад новую сучасную тэхніку просяцца і акуратныя ангары, мехмайстэрні – гэта разумеюць у сельгаспрадпрыемствах. Радуе, што дагледжанымі выглядаюць мехдвары ў ААТ “Целяханы-агра”, “Горталь”, “Падстарынь”… Пры гэтым нагадаю, што ААТ “Новыя Стайкі” і “Святая Воля” спаборнічаюць у аглядзе-конкурсе на абласным і рэспубліканскім узроўнях.