На зімовых дарогах небяспечна
У першай дэкадзе студзеня 2019-га года зарэгістраваны новыя факты дарожнатранспартных здарэнняў на тэрыторыі нашага раёна.
Вось два самыя буйныя з іх: 5 студзеня на аўтадарозе Івацэвічы-Пінск-Столін, непадалёку ад в. Гічыцы, вадзіцель легкавіка рушыў на абгон, але пасля выканання манеўру не справіўся з кіраваннем аўто. Як вынік, аўтамабіль вынесла на сустрэчную паласу, адбылося лабавое сутыкненне з двума другімі транспартнымі сродкамі. На шчасце, сур’ёзных траўмаў у выніку гэтага ДТЗ ніхто не атрымаў.
Штосьці падобнае 7 студзеня адбылося на “алімпійцы”: легкавік, якім кіравала жанчына з Баранавічаў, сутыкнуўся са снегаўборачным МАЗам. І тут абышлося без сур’ёзных цялесных пашкоджанняў, а сам выпадак толькі пацвярджае: кіраванне аўтамабілем у зімовы перыяд патрабуе асаблівых навыкаў ад вадзіцеля. Дарэчы, і ў мінулыя гады ў нашым раёне неаднаразова фіксаваліся ДТЗ з удзелам снегаўборачных аўтамабіляў. Ёсць над чым задумацца.
Ужо зафіксаваны першы выпадак сутыкнення аўтамабіля і дзікай жывёлы ў 2019-м годзе: на ўчастку паміж в. Доўгая і г. п. Целяханы легкавік збіў лася. На гадзінніку было каля 18 гадзін вечара. На шчасце, ніхто з удзельнікаў руху не пацярпеў, жывёла загінула. Звяртаю увагу, што каля 50 ДТЗ штогод з удзелам дзікіх жывёл фіксуецца на тэрыторыі нашага раёна. Вадзіцелі гэта павінны ўлічваць пры выбары хуткасці.
Сумна, але тыя ДТЗ, якія зафіксаваны напрыканцы мінулага года, пагоршылі агульную статыстыку ахвяр здарэнняў. Так, жанчына з Амяльной, якая 17 снежня разам з мужам на “Маздзе” ехала ў Івацэвічы і трапіла ў ДТЗ з удзелам буса (ім кіраваў жыхар Целяхан), – памерла. А стан жанчыны, якая на "Аўдзі" збіла двух ласёў на “алімпійцы” (адзін нават заляцеў у салон аўто), паранейшаму вельмі цяжкі; за гэтыя чатыры тыдні яна так і не прыйшла ў прытомнасць.
Васіль ЖУР, начальнік АДАІ Івацэвіцкага РАУС.