На лыжню – за здароўем!
За апошнія гады мы прызвычаіліся да капрызаў зімы. Не паспее выпасці снег і ўсталявацца марознае надвор'е, глядзіш – зноў адліга. Таму навучэнцы УА “Івацэвіцкі дзяржаўны прафесійны ліцэй сельскагаспадарчай вытворчасці” часу не губляюць, а з новым снегам выходзяць на лыжню.
Пакінуўшы падручнікі і сшыткі ва ўтульных кабінетах, хлопцы аддалі перавагу свежаму паветру і спорту, уключыліся ў зімовы марафон. Кажуць, што на лыжню выйшлі з радасцю і адзначаюць, што з задавальненнем згулялі б і ў хакей.
На сонцы зіхаціць снег, мароз шчыпле румяныя твары, яркімі плямамі мільгаюць новыя лыжы у снезе, некаторыя на хаду губляюць лыжныя палкі, але зарад станоўчых эмоцый ад гэтага не становіцца меншым – так праходзяць іх заняткі па фізічнай культуры.
– Як толькі выпаў снег, адразу сталі на лыжы. Шкада, калі хутка растане. Дзецям падабаюцца такія заняткі. І хай у некаторых не з першага разу атрымліваецца “пасябраваць” з лыжамі, але яны атрымліваюць зарад бадзёрасці і добрага настрою – адзначыла кіраўнік фізвыхавання Таццяна Віктараўна Бірук.
Лыжная база ў прафліцэі – на зайздрасць любому аматару лыжнай язды. Дэфіцыту ў лыжным аснашчэнні няма. Кожны год закуп-
ляюцца новыя пары, а тыя, што праслужылі ўжо не адзін год, выкарыстоўваюцца беражліва і маюць патрэбны догляд, таму будуць радаваць навучэнцаў яшчэ доўга. Спецыяльна былі закуплены лыжныя чаравікі для дзяўчат.
Таццяна Віктараўна Бірук расказала, што ў прафліцэі вялікая ўвага надаецца прапагандзе і вядзенню здаровага ладу жыцця – акрамя спартыўнай залы, папулярнасцю сярод навучэнцаў карыстаюцца і трэнажорныя залы. Ёсць тут вялікія аматары спорту, таму каманды прафліцэя прымаюць удзел ва ўсіх раённых, абласных спаборніцтвах і прывозяць розныя ўзнагароды, у тым ліку і вышэйшай пробы.
– Спартыўныя спаборніцтвы доўжацца ў нас на працягу амаль ўсяго навучальнага года, – расказала Таццяна Віктараўна. – У верасні пачынаюцца змаганні па міні-футболе, затым – баскетбол і валейбол, зараз рыхтуемся да зімовага шматбор’я, сюды ўваходзіць лыжная падрыхтоўка, скачок з месца, падцягванне і стральба. У мінулым годзе на абласных спаборніцтвах па зімнім шматбор’і наша каманда заваявала трэцяе месца, у гэтым годзе будзем старацца заняць вышэйшае месца на п’едэстале. Кожны год наша каманда ўдзельнічае ў раённым лёгкаатлетычным кросе, і кожны раз з узнагародамі. Дарэчы, у гэтым годзе будзем прымаць абласныя змаганні па летнім шматбор’і. Кажуць, што дома і сцены дапамагаюць, таму будзем чакаць добрых вынікаў ад каманды. Трэба сказаць, што дзякуючы падтрымцы аддзела па адукацыі райвыканкама і адміністрацыі УСУ “ДЮСШ Івацэвіцкага раёна” дзеці з “Цэнтра прафесійнай і сацыяльнай рэабілітацыі для навучання асоб з асаблівасцямі псіхафізічнага развіцця і інвалідаў”, які дзейнічае на базе прафліцэя, могуць наведваць некалькі месяцаў у год на бясплатнай аснове плавальны басейн. Яны ходзяць туды з вялікім задавальненнем, і гэта сапраўды тыя дзеці, каму патрэбны такія сеансы.
Ганна ІЛЬЯШЭВІЧ, фота Валерыя МІСКЕВІЧА. На здымку: намеснік дырэктара па выхаваўчай рабоце Міхаіл Аляксеевіч Сухан праводзіць заняткі з навучэнцамі групы №339 УА "Івацэвіцкі дзяржаўны прафесійны ліцэй сельскагаспадарчай вытворчасці".