Новыя транспартныя калідоры
знізяць нагрузку на вуліцу Чарткова і другарадныя вуліцы
Жыхары вуліцы Славянская ў Івацэвічах неаднаразова скардзіліся ў розныя інстанцыі па наступнай прычыне: праезная частка вуліцы мае гравійнае пакрыццё, што стварае праблемы. Пыл, які ўздымаецца ў паветра, ляціць у вокны дамоў, у агароды. Вуліца даволі актыўна эксплуатуецца, таму, па меркаванні жыхароў, тут “просіцца” асфальт.
Скаргі па праблеме вул. Славянская ў апошні час ўздымаліся і на абласным узроўні. Начальнік аддзела архітэктуры і будаўніцтва, галоўны архітэктар Івацэвіцкага раёна Ірына ІВАНОВА дала разгорнуты
адказ па дадзенай праблеме:
– За кошт дадаткова выдзеленых бюджэтных сродкаў, згодна з распрацаванай раней праектна-каштарыснай дакументацыяй па аб’екту “Пад’езд да квартала забудовы індывідуальнай забудовы “Заходні” ў г. Івацэвічы”, завершана ўстройства асфальтабетоннага пакрыцця з пешаходнай дарожкай па цотным баку часткі вуліцы Славянская да перакрыжавання з вул. Інтэрнацыянальнай, а таксама часткі вул. Інтэрнацыянальная ад перакрыжавання з вул. Славянская да вул. М. Танка. Гэта дазволіла забяспечыць бяспечны рух пешаходаў ад квартала шматкватэрнай забудовы па вул. М. Танка да ДУА “СШ №3 г. Івацэвічы”, звязаць індывідуальную забудову з аб’ектамі грамадскага прызначэння і гандлю, якія знаходзяцца на вуліцах Дэпутатская, 70 год Кастрычніка, М. Танка.
Таксама распрацавана праектна-каштарысная дакументацыя на далейшае ўстройства асфальтабетоннага пакрыцця вул. Інтэрнацыянальная на аб’екце “Добраўпарадкаванне вул. Інтэрнацыянальная ў г. Івацэвічы”. У 2019-м годзе пры запланаваным асігнаванні бюджэтных сродкаў будзе выканана ўстройства асфальтабетоннага пакрыцця гэтай вуліцы.
Устройства дарогі і ўдасканаленае пакрыццё, якое з’явіцца на вуліцах Інтэрнацыянальная і М. Танка ад вул. Леніна да вул. Механізатараў, дазволіць знізіць транспартную нагрузку на вул. Чарткова, па якой ажыццяўляецца асноўны рух аўтамабіляў жыхароў “спальных мікрараёнаў” горада да цэнтра Івацэвічаў і ў зваротным кірунку, а таксама арганізаваць транзітны рух грузавых аўтамабіляў у кірунку Гродна. Адначасова вядуцца работы па вуліцах 60 год Кастрычніка і Спартыўная, што створыць яшчэ адзін транспартны калідор і дазволіць яшчэ больш разгрузіць вул. Чарткова.
На вул. Славянская ў квартале індывідуальнай забудовы ўстаноўлены знакі дарожнага руху, якія абмяжоўваюць хуткасны рэжым і рух грузавога транспарту – транспартная нагрузка на дадзеным участку вуліцы зніжана. Пакрыццё праезнай часткі гэтай вуліцы – з пясчана-гравійнай сумесі, яно знаходзіцца ў здавальняючым стане. Па устаноўленаму графіку, а таксама пры ўзніклай неабходнасці, ДУВП “Івацэвіцкая ЖКГ” тут праводзіцца грэйдзіраванне пакрыцця… Спадзяюся, што жыхары Івацэвічаў з разуменнем адносяцца да работ па добраўпарадкаванні райцэнтра.