Спаборніцтвы "Снежны снайпер"

На спартыўных аб’ектах СШ №4 г. Івацэвічы ў мінулую суботу, 12 студзеня, прайшло спартыўна-масавае мерапрыемства “Раённае спаборніцтва сярод дзяцей і падлеткаў па біятлоне “Снежны снайпер-2019” на прызы “Прэзідэнцкага спартыўнага клуба”. Спаборніцтвы ладзяцца ўпершыню ў нашым раёне, мэта – максімальна зацікавіць і наблізіць падрастаючае пакаленне да такога вельмі папулярнага віду спорту, як біятлон. Падчас адкрыцця начальнік аддзела па адукацыі райвыканкама Ігар Куіс у першую чаргу падзякаваў дзецям і іх настаўнікам фізкультуры за тое, што першы старт аказаўся па-сапраўднаму масавым: каманды з 22 школ раёна бралі ўдзел, а гэта каля 130 хлопчыкаў і дзяўчынак з Івацэвічаў і раёна. Выступоўца таксама звярнуў увагу, што па выніках раённага старту будзе сфарміраваная каманда Івацэвіцкага раёна, якой прадстаіць гонар змагацца на абласным і, магчыма, рэспубліканскім узроўнях.

Ганаровае права ўзняць сцяг краіны атрымалі вучні СШ №4 г. Івацэвічы Ю. Капыціч і І. Маркаў. Гучыць гімн. Пасля кароткай прамовы галоўнага суддзі спаборніцтваў А. А. Міц- кевіча пачынаюцца старты, у ходзе якіх хлопчыкі і дзяўчаты атрымалі незабыўны зарад эмоцый.

Вось вынікі: агульнакаманднае першае месца ў старэйшай узроставай групе заваявала СШ №4 г. Івацэвічы, на другім месцы – ліцэй Івацэвіцкага раёна, на трэцім – Рэчкаўская СШ. У сярэдняй узроставай групе самая паспяховая Даманаўская СШ, на п’едэстале гонару таксама Быценская СШ і СШ №4 г. Івацэвічы, сярод самых малодшых першынствавала СШ №3 г. Івацэвічы, на другім месцы Воленская СШ, на трэцім – Зяленаборская СШ.

Сфарміраваная каманда з 12 чалавек, якія прадставяць наш раён на абласным этапе 17-18 студзеня ў г. п. Мір Баранавіцкага раёна.

Малодшая група: Цімур Юрэня з Дабромысленскага дзіцячага садасярэдняй школы, Арсеній Кушнір з СШ №4 г. Івацэвічы, Валерыя Кулецкая з Гошчаўскай СШ, Анастасія Дылюк з СШ №4 г. Івацэвічы; сярэдняя група: Дзмітрый Сцепанчук – Дабромысленскі дзіцячы сад-сярэдняя школа, Кірыл Лось – СШ №3 г. Івацэвічы, Інэса Мікіціна і Ілона Неўдах - Гошчаўская СШ; старэйшая група: Іван Гегеня – ліцэй Івацэвіцкага раёна, Аляксандр Русак – Волькаўская СШ, Аксана Пераверзева – Любішчыцкая СШ, Ксенія Якаўчук – Гошчаўская СШ.