У рамках гуманітарнага праекта
У рамках гуманітарнага праекта Міжнароднага дабрачыннага грамадскага аб’яднання “Сафія” была аказана дапамога ДУ “Целяханскі псіханеўралагічны дом-інтэрнат для састарэлых і інвалідаў” ў выглядзе сучаснай дэзынфекцыйнай камеры, якая працуе ў аўтаматычным рэжыме.
Новае абсталяванне – дэзынфекцыйную камеру – Целяханскі псіханеўралагічны дом-інтэрнат для састарэлых і інвалідаў атрымаў і ўстанавіў летась у кастрычніку і за некалькі месяцаў работы спецыялісты і супрацоўнікі, а найбольш дэзынфектар інтэрната Алена Фядковіч, змаглі ацаніць усе яе плюсы. Камера працуе бездакорна, яна ўстаноўлена ў сцяне паміж двума пакоямі. У першым пакоі з асобным выхадам дэзкамера загружаецца пасцельнай і індывідуальнай бялізнай хворых на вірусны гепатыт ці на туберкулёз, шчыльна зачыняецца і ў аўтаматычным рэжыме набіраецца патрэбная тэмпература. Як толькі цыкл дэзынфекцыі завяршаецца, датчыкі падаюць сігнал і камеру можна адчыняць і разгружаць праз дзверы камеры з суседняга пакоя. Камера выкарыстоўваецца для дэзынфекцыі бялізны пражываючых пасля інфекцыйных захворванняў, пасля знаходжання ў ізалятары часовага прабывання і для дэзінфекцыі ніжняй бялізны кожнага пражываючага. Штодзень на працягу рабочага дня камера загружаецца два разы і працуе прадукцыйна.
На днях гуманітарныя валанцёры МДГА “Сафія” Уэслі і Руфь Джоунс наведалі Целяханскі псіханеўралагічны дом-інтэрнат для састарэлых і інвалідаў, каб пацікавіцца, наколькі зручным і патрэбным аказалася новае абсталяванне, ці захоўваюцца правілы яго эксплуатацыі і бяспекі, а таксама, каб абмеркаваць кірункі і магчымасці далейшага супрацоўніцтва.
Дарэчы, з Міжнародным дабрачынным грамадскім аб’яднаннем “Сафія” Целяханскі і Косаўскі дамы-інтэрнаты сябруюць даўно. Колькі гадоў таму гуманітарныя валанцёры “Сафіі” падарылі Целяханскаму псіханеўралагічнаму дому-інтэрнату прамысловую швейную машыну, якая і сёння працуе, як гадзіннік, параканвектамат у сталовую, абсталяванне для цырульні, кардыёграф. Косаўскі псіханеўралагічны дом-інтэрнат для састарэлых і інвалідаў у 2016 годзе таксама атрымаў ад “Сафіі” істотную дапамогу: прамысловую сушыльную машыну на 25 кілаграмаў бялізны, 12 проціпролежневых матрацаў, два дзясяткі шматфункцыянальных медыцынскіх ложкаў з матрацамі, маразільнік, лямпу для святлолячэння і іншае абсталяванне.
Кіраўніцтва Целяханскага псіханеўралагічнага домаінтэрната для састарэлых і інвалідаў у асобе дырэктара Івана Дзядка і галоўнай медсястры Наталлі Хаміцэвіч падзякавалі гасцям за наведванне ў гэтыя святочныя дні, выказалі шчырую ўдзячнасць за дапамогу і спадзяванне, што супрацоўніцтва прадоўжыцца. У сваю чаргу сямейная пара Джоунс расказала аб іншых гуманітарных праектах, якія былі рэалізаваны ў Беларусі валанцёрамі з Амерыкі летась, і прынамсі, у Брэсцкай вобласці. Таксама Уэслі і Руфь Джоунс расказалі аб традыцыях святкавання Раства Хрыстовага ў Амерыцы, аб дабрачыннай дзейнасці людзей на далёкім кантыненце і сваіх планах на бліжэйшы час па рэалізацыі двух дабрачынных праектаў у Гомельскай вобласці.