Цыгарэта і алкаголь – асноўныя складнікі гібелі людзей на пажарах

Нават беглы погляд на статыстыку гібелі людзей на пажарах у 2018 годзе ў нашым раёне дае адназначны адказ на пытанне, што стала прычынай такога значнага росту. Дзевяць жыхароў раёна загінулі ў 2018-м годзе – і ўсе яны пакінулі гэты свет па прычыне курэння ў ложку ў стане алкагольнага ап’янення.

У апошні час многа гаворыцца аб неабачлівасці чалавека, які прытрымліваецца дадзенай мадэлі паводзін. Тым не меней, напачатку артыкула хочацца звярнуць увагу яшчэ на адзін аспект: калі чалавек кладзецца ў ложак з запаленай цыгарэтай, то гэта сведчанне не толькі неабачлівасці, але, скажам прама, і бескультур’я.

На дадзены штрых у паводзінах арміі курыльшчыкаў звяртае ўвагу Ірына Круглей, урачпсіхіятр УАЗ “Івацэвіцкая ЦРБ”, да якой аўтар публікацыі звярнуўся за каментарыем па вышэйзгаданай праблеме:

– Нядаўна пераглядала фільм “Москва слезам не верит”. Выклікаў абурэнне той факт, што галоўны і, падкрэслю, станоўчы герой у адным з эпізодаў паліць цыгарэту ў памяшканні, дзе знаходзяцца іншыя людзі. Ледзь не ў ложку паліць! Цяпер перад многімі з нас стаіць задача – вытравіць такую норму паводзін з розуму чалавека, бо запаленая цыгарэта ў памяшканні – гэта ў любым выпадку кепска! Гэта міна запаволенага дзеяння. Працаваць трэба з людзьмі, асабліва з моладдзю, тлумачыць, што нікацін – псіхаактыўнае рэчыва, якое выклікае прывыканне і залежнасць. Але асноўная прычына, паўтаруся, адсутнасць культуры, бо калі б тыя, хто загінуў у нашым раёне ў 2018 годзе на пажарах, былі выхаваны належным чынам, то цыгарэту ў пакоі не запалілі б…

Давайце згадаем усе трагічныя выпадкі 2018 года, зарэгістраваныя райаддзелам па надзвычайных сітуацыях. Яны ўсе звязаныя з курэннем у ложку. 15 лютага загінуў мужчына ў в. Волька, 17 лютага – смерць мужчыны ў в. Верашкі, 18 сакавіка – у Целяханах, 20 сакавіка – трагедыя ў в. Селец, дзе загінулі мужчына і жанчына, 26 красавіка – гібель мужчыны ў Бялавічах, 20 красавіка – гібель жанчыны ў Даманаве, 16 лістапада трагедыя адбылася ў Квасевічах, 5 снежня – у Івацэвічах.

Факт апошняга ў 2018-м годзе трагічнага здарэння ў Івацэвічах нібы ўраўнаважвае фактар ап’янення і палення цыгарэты ў ложку. У мужчыны, які загінуў, у крыві выяўлена 3,5 праміле алкаголю. Гэта паказчык, які мяжуе з алкагольнай комай. Праваахоўныя органы дагэтуль не могуць дакладна вызначыцца з прычынай смерці мужчыны, бо тут фактычна назіраюцца два атру- чэнні – дымам ад цыгарэты і алкагольнае. Сёння суседзі ў цэлым станоўча згадваюць загінуўшага на пажары мужчыну, які пражываў на пятым паверсе. Падчас тушэння выратавальнікі затапілі некалькі кватэр, але іх гаспадары застрахавалі сваё жыллё і атрымалі страхавыя выплаты. Як бачыце, супрацоўніцтва са страхавымі арганізацыямі не зашкодзіць, калі ваш сусед ці суседзі не ўяўляюць свой адпачынак без тытуню і алкаголю.

Тым часам, новы 2019 год не дае выратавальнікам магчымасці “сумаваць”: ужо 1-га студзеня зарэгістраваны пажар у Любішчыцах, у выніку якога загінуў мужчына 1956 года нараджэння. Прычына? Паленне цыгарэты ў ложку ў стане алкагольнага ап’янення. Дык ці не атрымаецца так, што 2019 год збярэ яшчэ большы “ўраджай” ахвяр з ліку тых, хто ў нецвярозым стане кладзецца ў ложак з запаленай цыгарэтай? Ці не атрымліваецца так, што прафілактычная работа зацікаўленых службаў, нягледзячы на ўсе намаганні, “ляціць міма” тых асоб, каго тычыцца ў першую чаргу?

– Гэта адназначна адна з самых складаных праблем для нашага райаддзела, бо так званыя “ціхія п’яніцы” – самая некіруемая аўдыторыя. Але ўсё ж такі я паспрачаюся наконт таго, што трэба абвінавачваць у першую чаргу: алкаголь ці цыгарэту, – звяртае ўвагу начальнік Івацэвіцкага райаддзела па надзвычайных сітуацыях Васілій Бацкалевіч. – Паверце, што за ўсю гісторыю Івацэвіцкага РАНС не фіксавалася выпадкаў, каб цвярозы чалавек загінуў таму, што курыў у ложку. Толькі п’яныя гінуць! Я скажу болей – моцна п’яныя. Вынікі экспертыз нас саміх шакіруюць: то 3,5 праміле, то нават 4,0. Гэта ж каматозны стан. Чалавек можа не прачнуцца, памерці і без цыгарэты… Адсутнічае культура піцця…

Васілій Бацкалевіч звяртае ўвагу, што адзінокія людзі ва ўзросце пасля 50 гадоў – самая некіруемая аўдыторыя. “Ціхія п’яніцы” ў большасці жывуць адасобленым жыццём; ён можа цэлы дзень быць цвярозым, а вечарам возьме чарку ў рукі, запаліць цыгарэту... Камісія па прафілактыцы, у склад якой уваходзяць выратавальнікі, супрацоўнікі міліцыі, медыкі, прадстаўнікі ТЦСАН наведваюць такіх людзей, праводзяць тлумачальную работу, распрацавалі іншага кшталту мерапрыемствы на 2019 год, каб знізіць градус праблемы. Каля сотні такіх асоб “замацаваны” з дапамогай АПА (аўтаномны пажарны апавяшчальнік) да суседзяў, родзічаў. У гэтым сэнсе выратавальнікі чакаюць дапамогі і ад грамадства, бо толькі шырокая агульная тлумачальная работа дапаможа вырашыць праблему п’янства і палення цыгарэт у ложку.