З юбілеем, работнікі сацыяльнай службы!
18 студзеня ў Івацэвіцкім ГДК было шматлюдна, весела. У гэты дзень тут сабраліся работнікі сацыяльнай службы Івацэвічаў і раёна, ветэраны, госці ўрачыстасці – усе тыя грамадзяне, для каго работа ў сферы сацыяльнага забеспячэння стала прызваннем і лёсам. А нагода для сустрэчы больш чым слаўная – 100-гадовы юбілей службы.
З такім значным і, так бы мовіць, важкім юбілеем у ліку першых прысутных віншаваў намеснік старшыні райвыканкама Андрэй РЭГЕС:
– Толькі глыбокія пачуцці павагі да сябе выклікаеце вы, работнікі сацыяльнай службы, бо дапамагаеце бездапаможным, слабым, састарэлым… Гэта значыць, што дабрыні і спагады ў вашых сэрцах вельмі многа. Таму пажадаю кожнаму мець яшчэ больш цярпення, увагі, любві, бо, дзякуючы такім цудоўным чалавечым якасцям, робіце жыццё людзей больш радасным і светлым…
Андрэй Пятровіч узнагародзіў многіх Граматамі райвыканкама і раённага Савета дэпутатаў, а таксама Пісьмом падзякі райвыканкама лепшых работнікаў сацыяльнай службы раёна (на здымку).
На сцэну ўздымаецца начальнік упраўлення па працы, занятасці і сацыяльнай абароне райвыканкама Леанід Кавалевіч, які ў сваім выступленні адзначыў, што сацыяльная абарона была і застаецца прыярытэтным кірункам у палітыцы нашай дзяржавы. Да прыкладу, у раённым бюджэце на гэтыя мэты ў 2018-м годзе было запланавана болей за 3 млн 150 рублёў; пенсійным забеспячэннем у раёне ахоплены 16,7 тыс. чалавек, сямейны капітал прызначаны 125 сем’ям. Леанід Кавалевіч узнагародзіў Ганаровымі граматамі, Пісьмамі падзякі абласнога і раённага ўпраўленняў дзеючых работнікаў і ветэ- ранаў сацыяльнай службы раёна.
Дзяніс Пакалюк, дырэктар ДУ “Івацэвіцкі ТЦСАН”, звярнуў увагу прысутных на тое, што сённяшнія поспехі не былі б магчымымі без трывалага фундамента, які заклалі папярэднікі, ветэраны сацыяльнай службы… Ён узнагародзіў лепшых работнікаў Ганаровымі граматамі, Пісьмамі падзякі тэрытарыяльнага цэнтра. Старшыня раённага камітэта прафсаюзаў работнікаў дзяржаўных і іншых устаноў Людміла Куцко ў вершаваных радках пажадала кожнаму быць запатрабаваным у жыцці, вызначыцца добрымі справамі, узнагародзіла некалькі чалавек Ганаровымі граматамі прафсаюзаў абласнога і раённага ўзроўняў. Цёплым і ўзнёслым было віншаванне Івана Каленіка, кіраўніка раённага таварыства інвалідаў па зроку, які асабліва адзначыў дапамогу кіраўніцтва раёна ў тым, што ў нашым раёне працуе цэх, дзе сябе змаглі рэалізаваць многія інваліды.
Асаблівая ўвага і пашана – ветэранам упраўлення і тэрытарыяльнага цэнтра сацыяльнага абслугоўвання насельніцтва. Іх запрашаюць на сцэну. Ад імя ветэранаў слова ўзяў Анатоль Ярашук, які працаваў кіраўніком райсабеса з 1980 па 1988 гады. Выступоўца расказаў пра дзейнасць арганізацыі ў тыя няпро- стыя гады, асабліва падкрэсліўшы, што праца з падапечнымі патрабуе ад сацыяльнага работніка сапраўднага майстэрства, непадробнай дабрыні. Ім, ветэранам, на сцэне ўручылі падарункі Леанід Кавалевіч і Дзяніс Пакалюк. Шчырымі і ўзнёслымі былі віншаванні ад імя ўсіх старшынь сельвыканкамаў; са сцэны віншавалі сацыяльных работнікаў раёна Пётр Свібовіч (Жытлінскі сельвыканкам) і Галіна Панюк (Яглевіцкі сельвыканкам). Выступоўцы падкрэслілі: праца сацыяльных работнікаў робіць жыццё састарэлых і нямоглых людзей светлым і больш радасным, яны ўручылі два падарункі – калектывам упраўлення па працы, занятасці і сацыяльнай абароне райвыканкама і ТЦСАН.
Урачыстасць суправаджалася выступленнем творчых калектываў і самадзейных артыстаў Івацэвіччыны. Музычныя нумары дарылі і работнікі сацыяльнай службы раёна.