Паказчыкі добрыя, важна іх замацаваць
Агучваючы вынікі 2018-га года ў галіне жывёлагадоўлі, міжволі некалькі разоў ужываеш эпітэт “упершыню”. Пры гэтым ёсць адзін прыкметны паказчык, якім мы можам ганарыцца: упершыню сельгаспрадпрыемствы івацэвіцкага раёна надаілі за каляндарны год болей за 100 000 тон малака. Псіхалагічны бар’ер пераадолены, і трэба зрабіць усё, каб гэтая лічба стала звыклай, нікога не здзіўляла.
Увогуле, валавая вытворчасць малака за 2018 год склала 103 868 тон, гэта 104,7 працэнта да ўзроўня 2017 года. У фізічным вымярэнні наш раён надаіў на 4 701 тону болей за аналагічны перыяд 2017 года. Што тычыцца сярэдняга надою на карову, то ён склаў 5 429 кілаграмаў (+195). Па-ранейшаму, флагманамі ў дадзеным кірунку з’яўляюцца такія сельгаспрадпрыемствы як ААТ “Святая Воля”, дзе ад кожнай каровы надоена 7 736 кілаграмаў малака, СВУ “Даманава” РВУП “Брэстаблгаз”– 7 260, ААТ “Квасевічы” – 7 122, ААТ “Косава” – 6 046 кг. Агульнае пагалоўе кароў – 19 300, гэта +100 да 2017 года.
Што тычыцца якасці прадукцыі, то сортам “Экстра” за мінулы год рэалізавана 52,4 працэнта малака, вышэйшым сортам – 28,4. “Экстра” і вышэйшы сорт – 80,8 працэнта (+4,1 да 2017 года). Радуе, што стала паляпшацца сітуацыя з рэалізацыяй малака першым сортам: калі ў верасні мы мелі паказчык у 17,8 працэнта, то ў снежні – 10,5. Валавая вытворчасць малака на рэканструяваных фермах складае 62 працэнты ад агульнай вытворчасці. Працэнт рэалізацыі малака сортам “Экстра” да агульнага валавога надою на рэканструяваных фермах – 83,6 працэнта.
Што тычыцца вытворчасці (вырошчвання) жывёлы, то за 2018 год атрымана 8 065 тон мяса, або 104,5 працэнта да паказчыка 2017 года. Сярэднесутачныя прывагі – 573 грамы; рост ёсць, але ён, на жаль, нязначны. Добрыя прывагі ў СВУ “Даманава” РВУП “Брэстаблгаз”– 780 грамаў, ААТ “Квасевічы” – 704, ААТ “Святая Воля” – 702 грамы. Атрымана 21 065 галоў цялятак, ад 100 кароў маем выхад 73 цялятак, тут таксама ёсць рэзервы для росту. Невытворчае выбыццё маладняку складае 7,4 працэнта.
…Палова зімы ўжо мінула, зімоўка ў сельгаспрадпрыемствах раёна праходзіць няпроста, бо ёсць пэўныя праблемы з кармамі. Разам з тым, назіраецца гаспадарлівы падыход, вытрымліваецца памесячны графік выкарыстання кармоў; калі вясна будзе ранняй, то з зімоўкі павінны выйсці больш-менш спакойна.
Павел ПЯСЕЦКі, галоўны спецыяліст упраўлення
па сельскай гаспадарцы і харчаванні райвыканкама.