ААТ “Івацэвічдрэў” падвёў вынікі навагодняга праекта
Перш чым расказаць, хто стаў пераможцам эксклюзіўнага навагодняга праекта, які быў рэалізаваны ў ААТ “Івацэвічдрэў”, нельга не сказаць колькі слоў пра згуртаванасць калектыву і адкрытыя таленты сярод работнікаў прадпрыемства.
Найперш трэба адзначыць рамонтна-механічны цэх. Менавіта яго работнікі стварылі казачны фон да васьмі жывых елак, упрыгожанне якіх ацэньвалася журы. Усе фігуркі жывёл і кампазіцый з металічнага дроту, якія ўдала ўпісаліся ў агульную навагоднюю кампазіцыю, былі зроблены іх рукамі з душой і з веданнем справы. Увечары яны ззялі ілюмінацыяй – і гэта заслуга рамонтна-энергетычнага цэха, які падключыў вакол усё светлавое навагодняе аздабленне.
У выніку, дзякуючы новаму праекту прадпрыемства і старанням рамонтнамеханічнага і рамонтна-энергетычнага цэхаў, ААТ “Івацэвічдрэў” было прызнана пераможцам раённага конкурсу на лепшае навагодняе афармленне сярод прамысловых, будаўнічых, дарожна-будаўнічых прадпрыемстваў, лесагаспадарчых і абслугоўваючых арганізацый.
А калектыў рамонтна-будаўнічага ўчастка да навагодніх ранішнікаў, арганізаваных для дзяцей работнікаў прадпрыемства, стварыў такую казачную кампазіцыю ў зале, што яна стала самай запатрабаванай фотазонай сярод удзельнікаў свята, і гэтым можна ганарыцца.
Што ўжо казаць пра сам навагодні праект прадпрыемства! Ён ахапіў калектывы кожнага цэха і журы вымушана было акрамя дзвюх намінацый на “Лепшую навагоднюю ёлку” і “Лепшую навагоднюю цацку” аб’явіць і іншыя.
У намінацыі “Лепшая навагодняя ёлка” ўсе цэхі справіліся з пастаўленай задачай – праз створаныя цацкі адлюстравалі спецыфіку работы свайго цэха.
Пераможцам у гэтым конкурсе стаў калектыў драўняна-падрыхтоўчага цэха – 250, які ўпрыгожваў ёлку №1 і аздабляў адмысловымі драўлянымі снегавікамі, совамі і зайчыкамі тэрыторыю вакол яе. Другое месца прысуджана калектыву гаспадарчага аддзела, які рабіў цуда-цацкі на ёлку №7, трэцяе – калектыву па вытворчасці драўнінна-стружкавых пліт-250, які ўпрыгожваў ёлку №3 і стварыў кампазіцыю з аленямі і санямі, сімпатычнымі парсючкамі, сімвалам года, каля яе.
У намінацыі “Самая стыльная ёлка” перамога прысуджана калектыву цэха па ламінаванню ДСП і прапітцы-250, які ўпрыгожваў ёлку №2. У намінацыі “Самая смачная ёлка” перамог калектыў аддзела грамадскага харчавання і рознічнага гандлю, які аздабляў ёлку №6. У намінацыі “Самая драўляная ёлка” ўзнагароджаны калектыў раскройна-нарыхтоўчага цэха і склада сыравіны, які ўпрыгожваў ёлку №4. У намінацыі “Самая брэндавая ёлка” перамогу атрымаў калектыў цэха мэблевых дэталяў, пад патранатам якога была ёлка №5.
Усе пераможцы былі ўзнагароджаны дыпломамі, каштоўнымі падарункамі, грашовымі сертыфікатамі і салодкімі прызамі.
У намінацыі “Лепшая навагодняя цацка” першае месца прысуджана Сяргею Пятровічу Тадарчуку (гаспадарчы аддзел) за цацку “парсючок”, другое месца заняла Зоя Канстанцінаўна Палуяновіч (гаспадарчы аддзел) за мноства стыльных цацак з пенапласту, трэцяе месца – у Іны Мікалаеўны Кулініч (аддзел грамадскага харчавання і рознічнага гандлю) за цацку “шышка”, зробленую з пластыкавых лыжак.
У рамках навагодняга праекта ААТ “Івацэвічдрэў” з 25 снежня да 14 студзеня праходзіў яшчэ адзін конкурс – фотаконкурс #ИВАЦЕВИЧДРЕВ-2019. Свае фотаздымкі з фотазон каля навагодніх ёлак прадпрыемства размяшчалі ў трох сацыяльных сетках усе жадаючыя. Пераможцы вызначаны з дапамогай генератара выпадковых лічбаў. Імі сталі Вольга Радзіонава – ААТ “Івацэвічдрэў”, Уладзімір Бубек – ДЛГУ “Івацэвіцкі лясгас” (на здымку – жонка) і Кацярына Леановіч – дамашняя гаспадыня.
Віншуем пераможцаў!