Паспрачаліся маці з дачкой…

Жыхарка Івацэвічаў пражывае з дачкой, але адносіны паміж імі складаныя, часта суправаджаюцца сваркамі, скандаламі. Вось і ў адзін з вечароў паміж гэтымі ўжо немаладымі жанчынамі – маці 62 гады, дачцэ – 43 гадоў – на кухні ўзнік канфлікт, у ходзе якога знерваваная маці шпурнула ў “саперніцу”… посуд з селядцамі. Кінула “ўдала”: дачку літаральна заляпіла селядцамі і заліло алеем. Яна ў сваю чаргу не стрывала, схапіла нож і кінула ім у маці.

І таксама трапна: нож трапіў у руку. Выклікалі медыкаў, супрацоўнікаў праваахоўных органаў. Жанчыны, у рэшце рэшт, прымірыліся – родныя людзі ўсё ж такі, але пракурор Івацэвіцкага раёна прыняў рашэнне ўзбудзіць крымінальную справу: скандальную сям’ю не зашкодзіць прапусціць праз судовыя калідоры, каб кожны з іх мог моцна задумацца наконт уласных паводзін.

І яшчэ. На момант гэтых “разборак” 43-гадовая дачка знаходзілася ў стане алкагольнага ап’янення. Хочацца звярнуць увагу жыхароў раёна, паводзіны якіх “пагранічныя” з парушэннем Закона: нецвярозы стан – аснова падобных здарэнняў, таму важна жыць цвяроза, каб пазбегнуць канфліктных сітуацый, не хапацца за нож, а пасля не сядаць на лаву падсудных.

Аксана КОРЗУН, следчы Івацэвіцкага райаддзела

Следчага камітэта Рэспублікі Беларусь.