Каранавірус вяселлю не памеха?
Карэспандэнт «ІВ» даведаўся, як працуе ЗАГС у Івацэвічах ва ўмовах пандэміі і ці змяніліся планы маладажонаў раёна
Каталіцкі і праваслаўныя посты мінулі, а значыць, традыцыйна адкрываецца сезон вяселляў. Шлюбы, як вядома, заключаюцца на нябёсах, але афармляюцца ўсё ж у ЗАГСАХ, на якія зараз таксама распаўсюджваюцца агульнарэспубліканскія меры, уведзеныя для барацьбы з каранавіруснай інфекцыяй.
Як паведаміла начальнік аддзела ЗАГС Івацэвіцкага райвыканкама Наталля Аўрусевіч, масавай адмены або пераносаў цырымоній заключэння шлюбу ў раёне не назіраецца. Толькі адна пара пажадала перанесці шлюбную цырымонію з пачатку мая на канец месяца. Першыя выхадныя пасля Вялікадня прайшлі актыўна: у пятніцу і суботу, 24 і 25 красавіка, аддзелам ЗАГС Івацэвіцкага райвыканкама былі зарэгістраваны 9 шлюбаў.
– Мы просім маладых запрашаць на цырымонію шлюбу абмежаваную колькасць удзельнікаў. Калі яна праходзіць ва ўрачыстай абстаноўцы, то гэта да 10 чалавек, у тым ліку асобы, якія аказваюць паслугі відэа- і фотаздымкі. Усім гасцям даводзіцца выконваць дыстанцыю ў паўтара-два метры, – расказала Наталля Аўрусевіч. – Таксама мы раім не спяшацца з рэгістрацыяй шлюбу людзям сталага ўзросту, перачакаць гэты небяспечны для здароўя перыяд, але рашэнне ўсё ж такі прымаюць самі маладажоны. Хочацца падзякаваць маладым, іх бацькам за разуменне мер, якія прымаюцца ў сувязі з эпідэміялагічнай абстаноўкай.
Кожны дзень у ЗАГСЕ праводзіцца вільготная ўборка з ужываннем сродкаў дэзінфекцыі, праветрываюцца памяшканні, праціраюцца дзвярныя ручкі, сталы і канцылярскія прыналежнасці. Вільготная ўборка праводзіцца пасля кожнай рэгістрацыі шлюбу. Таксама ў фае маецца дазатар з дэзсродкам для рук.
25 красавіка ў Івацэвіцкім ЗАГСЕ нарадзілася сям’я Рамана і Валерыі Мядзведзькаў. Маладыя кажуць, што эпідэміялагічная сітуацыя ў краіне не стала перашкодай для ўрачыстасці.
– У нашай сітуацыі амаль нічога не змянілася ў сувязі з пандэміяй. Мы першапачаткова планавалі невялікае вяселле толькі для блізкіх. Так і атрымалася. Перанесці цырымонію не маглі з-за напружанай працы мужа. Ён працуе ў сістэме МНС, а цяпер у іх «гарачая» пара, якая будзе цягнуцца яшчэ ўсё лета. Пры падрыхтоўцы да вяселля зменшылі асабістыя кантакты з работнікамі вясельнай індустрыі: усе пытанні вырашалі па тэлефоне ці ў інтэрнэце. Непасрэдна падчас падрыхтоўкі майстры – і цырульнік, і візажыст – працавалі ў масках і пальчатках. У ЗАГСЕ давялося зменшыць колькасць гасцей. Гэта было зроблена, каб госці маглі трымаць дыстанцыю. Вырашылі, што бабулям і дзядулям будзе больш бяспечна застацца ў гэты час дома. Лічым, што мер прафілактыкі ў такі час трэба прытрымлівацца.
Ганна ІЛЬЯШЭВІЧ.