Па нашай агульнай віне
Кантэйнерныя пляцоўкі для камунальных адходаў не адносяцца да месца, дзе, як кажуць, адпачывае і радуецца вока. У той жа час яны нярэдка становяцца месцам, дзе не лепшыя якасці дэманструюць тыя нашы грамадзяне, хто лічыць, што галоўнае – парадак ва ўласнай кватэры ці доме, што смецце можна не сартаваць, хто вывальвае яго на скрыні пляцовак ці нават не даносіць.
У выніку нярэдка прыходзіцца бачыць, як моцна загрувашчаны тыя 42 кантэйнерныя пляцоўкі ў Івацэвічах, што знаходзяцца на балансе нашай Івацэвіцкай ЖКГ. Хтосьці праводзіць рамонт, выносіць старую плітка, тынкоўку, мэблю, нейкія матрацы, акрамя гэтага – скошаную траву, галлё. І ўсё гэта звальваецца ў кучу на пляцоўку. Пасля людзі абураюцца, санітарныя службы выстаўляюць камунальнікам прэтэнзіі. Але, прабачце, хто ж прынёс гэтае смецце на пляцоўку і неахайна вываліў?
Няўжо толькі камунальнікі вінаваты?
А як павінна быць? Калі ў вас ёсць будаўнічае смецце, старая мэбля, то трэба патэлефанаваць па нумары 9-12-56. Да вашага дома
пад’едзе трактар і за не самую высокую суму грошай даставіць такія адходы на палігон у Міхнавічах. Хочацца завастрыць увагу прадпрымальнікаў, якія таксама выкарыстоўваюць пляцоўкі для скідвання адходаў: вамі могуць зацікавіцца адпаведныя службы – і прыцягнуць да адказнасці за тое, што пакідаеце свае адходы ў месцы, дзе вам гэта рабіць забаронена. Галоўная прычына адсутнасці парадку на пляцоўках для камунальных адходаў – абыякавасць і раўнадушша многіх людзей да праблем камунальнікаў. Чысціня залежыць ад кожнага! Таццяна ДЫЛЮК, спецыяліст па ідэалагічнай рабоце ДУВП «Івацэвіцкая ЖКГ».