Захваральнасць на COVID-19 ніжэйшая за прагноз

Некаторыя медустановы вяртаюцца да звычайнага рэжыму работы, паведаміў міністр аховы здароўя Дзмітрый Піневіч.

«Яшчэ да Новага года, да святочных мерапрыемстваў мы заўважылі даволі ўстойлівую тэндэнцыю па зніжэнні захваральнасці, яна датычыцца ўсіх рэгіёнаў. Такую ж сітуацыю назіралі і падчас святочных дзён. Зыходзячы з існуючых даных, было прынята рашэнне аб тым, каб некаторыя нашы ўстановы выйшлі з так званага рэжыму работы інфекцыйных стацыянараў», – сказаў Дзмітрый Піневіч.

Што датычыцца ў цэлым захваральнасці на COVID-19, Дзмітрый Піневіч заўважыў, што на гэты момант рэальная карціна больш аптымістычная, чым прагназавалася. «Гэта значыць, захваральнасць нават на больш нізкім узроўні, чым гэта ў нашых прагнозах», – адзначыў ён, разам з тым дадаўшы, што «з каранавірусам будзем жыць да канца вясны. – Але мы лічым, што своечасова праведзеная вакцынацыя (у гэтым годзе вакцынавана больш за 40 працэнтаў насельніцтва) дае магчымасць прагназаваць невысокі ўздым захваральнасці».

Дзмітрый Піневіч таксама адзначыў зніжэнне колькасці цяжкіх пацыентаў на 10-15 працэнтаў. Інфармацыя аналізуецца штодзень. На пастаянным кантролі наяўнасць неабходнай апаратуры, у тым ліку для кіслароднага забеспячэння пацыентаў.