Электравудзільшчыкі на лаве падсудных

Больш за 170 тыс. руб. павінны заплаціць дзяржаве браканьеры

У 2020 годзе супрацоўнікамі прыродаахоўных арганізацый Беларусі ўстаноўлены чатыры факты лоўлі рыбы без перабольшвання варварскім спосабам – электравудай. З іх самы вялікі ўрон прыродзе нанеслі браканьеры – двое мужчын, якія «гаспадарылі» на рацэ Мышанка ў Дабромысленскім сельсавеце. Вызначыўся наш раён, нічога не скажам.

Гэтыя немаладыя, раней не судзімыя мужчыны перадпенсійнага і пенсійнага ўзросту, абодва з вышэйшай адукацыяй – педагагічнай і інжынернай – у цёмны час сутак 21 кастрычніка 2020 г. выплылі на лодцы на раку Мышанка. На «ўзбраенні» электралавільнае абсталяванне, прынцып работы якога аснаваны на выкарыстанні электрамагнітнага поля. Мужчыны некалькі гадзін «здабывалі» рыбу, але апоўначы былі затрыманы з палічным супрацоўнікамі Дзяржінспекцыі аховы жывёльнага і расліннага свету. Памер урону ўражвае – больш за 165 000 рублёў, бо злавілі гэтыя мужчыны 899 экзэмпляраў рыб – плоткі, шчупакі, акуні, ментузы…

Была ўзбуджана крымінальная справа.

У ходзе судовага пасяджэння абвінавачаныя поўнасцю прызналі сваю віну і раскаяліся. Адзін з іх падрыхтаваў цэлы том дакументаў і характарыстык, якія сведчаць аб яго актыўнай жыццёвай пазіцыі, грамадзянскай свядомасці... Тым не менш, санкцыя суда, калі нанесены такі вялікі ўрон, прадугледжвае толькі пазбаўленне волі.

Суд разглядзеў дадзеную справу і прызначыў пакаранне кожнаму з мужчын – тры гады пазбаўлення волі (з адтэрміноўкай пакарання на 1 год). Яны павінны кампенсаваць дзяржаве нанесены ўрон, маёмасць іх арыштавана. Па словах гэтых мужчын, менавіта неабходнасць заплаціць дзяржаве велізарны ўрон для іх стала сапраўдным горам. Вось лічбы: асабліва буйны ўрон па заканадаўстве – гэта 250 базавых велічынь і больш, а гэтыя мужчыны нанеслі яго на… 6 117 базавых велічынь! Дадайце, што яны, акрамя 165 000 рублёў, павінны заплаціць дзяржпошліну ў даход дзяржавы – 8 213 рублёў і штраф – 70 базавых велічынь кожны.

Памер урону залежыць і ад каштоўнасці рыбы. Вось прыклад: такса за незаконную здабычу плоткі ці гусцяры – адна базавая велічынь і больш, а ментуза (атрад траскападобныя) – дзевяць! Памнажаем на пяць (заканадаўца патрабуе памножаць на пяць па прычыне вялікай шкоды электравуды) – і атрымліваецца, што адзін мянтуз каштаваў абвінавачаным 45 базавых велічынь.

Мужчыны сталі паступова выплачваць дзяржаве нанесены ўрон. Яны ледзь не плакалі ў судзе: мы ж да смерці не аплацім гэты ўрон! Што тут можна сказаць: у такім сталым узросце чалавек павінен разумець, якая адказнасць яго чакае за ўчынак.

Прысуд не ўступіў у законную сілу.

Васіль АЎРУСЕВІЧ, старшыня

суда Івацэвіцкага раёна.