ААТ «Перамога» трымае курс на развіццё
Гаспадарка і яе работнікі не раз станавіліся пераможцамі ці былі прызёрамі раённага спаборніцтва ў розных намінацыях, а сёлета калектыў ААТ «Перамога» ўзнагароджаны Ганаровым пераходным сцягам і Граматай Івацэвіцкага райвыканкама за дасягненне лепшых паказчыкаў па выкарыстанні інвестыцый у асноўны капітал сярод арганізацый усіх сфер вытворчасці і форм уласнасці.
У разгар пасяўной мы пабывалі ў «Перамозе».
– Сельская гаспадарка з’яўляецца асновай жыцця, так было заўсёды, – кажа дырэктар ААТ «Перамога» Уладзімір Ядала, калі мы накіроўваліся на поле, дзе вялася сяўба аўса. – 19 гадоў назад, калі я стаў кіраўніком гаспадаркі, мы прадавалі за дзень па сем з паловайвосем тон малака, а цяпер амаль па 30 тон. Тады было работнікаў 320-340 чалавек, цяпер – 201. А калі ўзяць, што сем гадоў таму да нас далучылі «Чарткова», то мы сталі самай вялікай гаспадаркай у раёне. З сельскагаспадарчых зямель у 8060 гектараў амаль палова пераворваецца штогод. Як і іншыя гаспадаркі раёна, мы займаемся раслінаводствам, практычна, для патрэб жывёлагадоўлі. Пагалоўе вырасла і налічвае сёння 6242 галавы буйной рагатай жывёлы, з іх дойны статак – 2025 кароў. Вытворчасць павялічылася, нагрузка на работнікаў таксама. Але тэхналогія мяняецца, жыццё не стаіць на месцы. І мы стараемся ісці ў нагу з часам, шмат будуем, рэканструіруем тое, што будавалі 20 гадоў таму.
Заканчэнне.
Пачатак на 1-й стар.
Добры гаспадар кажа: «Калі за дзень хоць адзін цвік уб’еш, то за год новы плот пабудуеш». І мы штогод нешта стараемся зрабіць для людзей і ўмоў іх працы, а таксама для ўмоў утрымання жывёлы…
На МТФ «Вулькааброўская №1»
Летась ААТ «Перамога» ў рэканструкцыю МТФ «Вулька-аброўская №1» уклала шмат сваіх сродкаў, кіраўнік казаў, падлічвалі, то больш за мільён рублёў выйшла. Таксама ўкладзены ў рэканструкцыю аб’екта заёмныя сродкі ААТ «Савушкін прадукт», крэдыт Аграпрамбанка і закуплена абсталяванне па лізінгу.
– Уявіце, у чэрвені мінулага года пачалі рэканструкцыю МТФ «Вулька-аброўская №1» і да снежня пабудавалі даільную залу, а таксама зрабілі рэканструкцыю двух памяшканняў гаспадарчым спосабам. Такі вялізны аб’ём работы за рэкордны тэрмін зрабіць было няпроста, – падкрэслівае кіраўнік. – Вельмі добра спрацавалі. Сёлета работы на гэтым аб’екце працягваюцца. Дворыкі для жывёлы будуць абсталяваны, будзе пабудаваны новы прафілакторый для цялят, цэх раздою, цэх сухастою. У выніку павінен атрымацца сучасны малочнатаварны комплекс.
Паралельна ў гаспадарцы вядзецца рэканструкцыя комплексу «ВулькаАброўская №2», на комплексе «Грудыя» яна вялася ў 2013 годзе. У далейшым плануецца з фермы «Козікі», дзе яшчэ жывёла на прывязным утрыманні, забраць кароў і размеркаваць па трох комплексах з даільнымі заламі.
– У цэлым гаспадарка за мінулы год спрацавала няблага – тэмп росту валавой прадукцыі пры заданні 104 працэнты склаў 109,9 працэнта, нягледзячы, што людзі хварэлі ў сувязі з каранавірусам, – расказвае галоўны эканаміст Вольга Слінка. – Дойны статак утрымліваецца ў чатырох падраздзяленнях. Надой на карову склаў за мінулы год 5891,1 кілаграма, у параўнанні з папярэднім годам плюс 56,1 кілаграма малака на кожную галаву. Па раслінаводстве летась быў добры рэзультат. Рост склаў 132,1 працэнта. Многа было нарыхтавана травяністых кармоў: 23 тыс. тон сенажу і 26 тыс. тон сіласу. Намалацілі 5076 тон збожжа.
– Радуе, што рэканструяваная МТФ «Вулька-аброўская №1» ужо плюсуе па паўтара літра на карову да ўзроўню мінулага года. Далей аддача будзе яшчэ большай, – дадае дырэктар. – Шчыра скажу, замінка была з каровамі, якія стаялі на прывязным утрыманні, а цяпер дояцца ў даільнай зале. Некаторых было цяжка перавучыць класціся ў лежакі, прыязджалі спецыялісты, давалі рэкамендацыі – выходзіць, трэба статак абнаўляць першацёлкамі. Асноўны ўхіл гаспадарка робіць на малако, але і мясам займаемся, калі палічыць, то капейка зарабляецца. Прывагі жывёлы на глыбокай падсцілцы па 700800 грамаў, а прывагі, дзе яна стаіць на рашотках, слабейшыя, таму будзем перарабляць памяшканні.
Мы наведаліся на МТФ «ВулькаАброўская №1» і на аб’екце сустрэлі і будаўнікоў, і работнікаў жывёлагадоўлі з загадчыцай Святланай Куцко, галоўнага заатэхніка Людмілу Куцко і загадчыка сектара арганізацыі працы і ідэалагічнай работы Юлію Ядала.
– Раней тут было стойлавае прывязное ўтрыманне жывёлы. А зараз для нашых каровак – камфорт: свабодна рухаюцца, свабодны доступ да вады, да кармоў. Жывёла падзелена на тэхналагічныя групы: 100, 200 дзён, 300, раздой… Пасля расцёлу кормім лепш, больш ім даём камбікорму, шроту, – расказвае галоўны заатэхнік. – Працаваць добра, умовы палепшыліся. Я ўжо ў гаспадарцы працую 30 гадоў, пачынала тэхнікам-асемянатарам, потым загадчыцай, зараз галоўны заатэхнік. Падвучылася, завочна скончыла акадэмію. У 50 гадоў, уяўляеце, была студэнткай…
– Аператары машыннага даення адзначаюць, што працаваць у даільнай зале наогул зручней і лепш, чым на ферме з малакаправодам, – дадае загадчыца.
Сёлета тут спадзяюцца выйсці на малако – не меней 6100 кілаграмаў на карову. У марах галоўнага заатэхніка – павялічыць надоі, каб праз час дацягнуцца да «Святой Волі». Для гэтага і робіцца рэканструкцыя на комплексах, бо маленькія фермы з малакаправодамі – гэта ўчарашні дзень. Яны аджылі сваё. У нас засталася такая ферма ў Козіках. Па ўмовах працы і па ўмовах для жывёлы – гэта зямля і неба ў параўнанні з комплексамі, – тлумачыць Людміла Фёдараўна. – Многа складаемых у «вялікага малака», пачынаючы ад захавання тэхналогіі, граматна падабранага рацыёну, а таксама якасці кармоў.
На МТФ «Вулька-аброўская №1» у памяшканнях светла, рольшторамі рэгулюецца праветрыванне. У такіх умовах малако прыбаўляецца штодзень, а значыць, аддача ад рэканструкцыі будзе расці.
– Спецыяльна, каб аблегчыць работу даглядчыкам, купілі трактар-падкідвальнік кармоў. Ён падкідвае і варушыць кармы за лічаныя хвіліны, – заўважае Юлія Ядала, загадчык сектара арганізацыі працы і ідэалагічнай работы. – Што значыць уручную і што на тэхніцы – розніца вялікая. Даглядчык рады і мы за яго. Людзі ж з гадамі не маладзеюць. Васіль Емяльянавіч Куцко – адзін са старэйшых жывёлаводаў. Акуратна і беражліва адносіцца да тэхнікі, старанны, як і яго жонка Любоў Куцко, якая працуе ў нас аператарам машыннага даення.
У ліку лепшых аператараў машыннага даення гаспадаркі Людміла Пікула, Таццяна Жабінская. Задаволены ў гаспадарцы і маладымі кадрамі: юрыстам, эканамістам, заатэхнікамі, ветурачамі… Тым не менш, на такі аб’ём работы, які вымалёўваецца сёння ў жывёлагадоўлі, тут будуць рады яшчэ двум заатэхнікам і двум ветурачам.
На сяўбе
Сяўба пачалася ў «Перамозе» ў 20 чыслах сакавіка. Яравы клін ранніх збожжавых – 720 гектараў. На дзень нашага наведвання, 1 красавіка, тут было засеяна каля 20 працэнтаў плошчаў.
Сяргей Квакуха, галоўны аграном, у полі каля вёскі Уласаўцы, казаў:
– Калі параўноўваць вясну, то летась выйшлі ў поле на 20 дзён раней і да 1 красавіка закончылі сяўбу ранніх яравых. Працуем зараз у тэмпе, стараемся, каб завяршыць работы да 10 красавіка. Для гэтага будзе прыцягвацца дзве, а, мо, і тры сеялкі, і будзем працаваць у дзве змены. 90 працэнтаў плошчаў – тарфянікі. З года ў год мы засяваем разам з зерневымі і кармавымі культурамі 4500-4600 гектараў. Нагрузка на спецыялістаў немалая, але калектыў у нас зладжаны, адзін аднаму дапамагаем, узбагачаем свой вопыт, чытаючы літаратуру, праглядваючы артыкулы ў інтэрнэце, ездзім на розныя семінары – заўсёды ёсць да чаго імкнуцца.
У агранамічнай службе гаспадаркі працуе аграном-насеннявод Вольга Квакуха, аграном участка Кацярына Бабіч і ўчотчык Валянціна Наліўка. Чакаюць тут і аграхіміка, малады спецыяліст давучваецца ў Пружанскім каледжы.
Пасяўную правесці ў сціслыя тэрміны няпроста яшчэ і таму, што на некаторых палях гаспадаркі глеба перасыхае на вачах і ўжо пыл стаіць, як сеюць, а на іншыя з-за павышанай вільгаці не можа ўвайсці тэхніка. Насеннем, угнаеннямі гаспадарка забяспечана. Выручае і тое, што тэхніку своечасова абнавілі. Вясной купілі новы Джон-дзір, культыватары КШП-10, КШП-9, новыя трактары і агрэгат для ўнясення мінеральных угнаенняў.
На думку кіраўніцтва гаспадаркі, выгадна вырошчваць усё, калі захоўваць тэхналогію. Сеюць у «Перамозе» трыцікале, жыта, авёс, пшаніцу, кукурузу… І дзяржзаказ выконваюць, і на продаж лішак маюць, і забяспечваюць сябе сваім камбікормам, якасным і паўнацэнным.
– Нагрузка ў іх вялікая, але дапамагае вопыт і прафесіяналізм. Іх работу можна не правяраць. Гэта нашы перадавікі – Міхаіл Данілеўскі, Павел Скідан, Іван Шэрка, браты Юрый і Сяргей Ласі, Сяргей Цімашэвіч і многія іншыя, – падкрэслівае Уладзімір Ядала.
За кошт таго, што абнавілі тэхніку ў лізінг і летась, і сёлета, расце вытворчасць працы механізатараў. На новай тэхніцы, больш магутнай, камфортнай і вытворчай, яны не заўважаюць нагрузкі і даюць па дзве нормы.
Умовы працы і кадры
Умовы працы палепшыліся, практычна, ва ўсіх падраздзяленнях, і адносіны да людзей беражлівыя. Абедамі і вячэрамі забяспечваюцца тыя, хто шчыруе на пасяўной, і гэта даўно стала нормай. Сёння даяркі ці механізатары могуць зарабіць і 1500 рублёў, і больш.
– Для кожнага працаўніка вёскі важна ведаць і адчуваць, што з імі гатовы раздзяліць не толькі поспех, але і няўдачу ва неўрадлівыя гады, што іх працу бачаць і цэняць, – казала Юлія Ядала.
Юлія Юльянаўна і на фермах, і ў полі часты госць, падтрымае і падбадзёрыць новенькага работніка, дасць слушную параду вопытнаму. Да яе сцякаецца інфармацыя штодзень з кожнай фермы па малаку, з вынікамі па сяўбе, яна лічбы параўнае, прааналізуе, і трымайся, калі ёсць упушчэнні. Але і за добры рэзультат не забудзе пахваліць, а калі і авансам добрае слова скажа.
Адметнасць гаспадаркі яшчэ ў тым, што ў Вульцы-аброўскай ёсць свой магазін «Эканомны». Яго, казала Юлія Юльянаўна, адкрылі з мэтай, каб работнікі гаспадаркі маглі набыць свежы, якасны тавар з мінімальнай гандлёвай нацэнкай. «Малочка» – з ААТ «Савушкін прадукт», каўбасы – з Бярозаўскага мясакамбіната. У асартыменце тавараў яшчэ бакалея, гаспадарчыя тавары. Людзі задаволены. Вяскоўцы і жыхары суседніх населеных пунктаў таксама тут атаварваюцца.
Валянціна БОБРЫК. Фота Валерыя МІСКЕВІЧА.
Пералічваючы складаемыя поспеху, кіраўнік звяртае ўвагу на механізатараў і вадзіцеляў, на адданасць якіх у працы можна заўсёды разлічваць.