«Гарачы сезон» для сонечнага насення
На Івацэвіцкім кукурузакалібровачным заводзе ў разгары прыёмка і перапрацоўка пачаткаў кукурузы на насенне
Вытворчасць кукурузы на насенне – няпростая і своеасаблівая справа. Рэзультатыўнасць канечнага выніку залежыць ад вельмі многіх складаемых, пачынаючы ад захавання тэхналогіі высеву насення ў глебу, вырошчвання кукурузы на насенне на палях да перапрацоўкі пачаткаў, сушкі і каліброўкі і іншай апрацоўкі насення на заводзе.
Але за гэтыя гады адпрацавана тэхналогія, кадры набраліся вопыту – і прадпрыемства працуе рэнтабельна.
З 2 кастрычніка Івацэвіцкі кукурузакалібровачны завод працуе кругласутачна – у тры змены. Але напружанасць рытму «гарачага сезона» на тэрыторыі прадпрыемства незаўважная: усе працуюць на сваіх месцах зладжана, без лішняй мітусні. І сёлета гэта неяк асабліва кінулася ў вочы, як і прыгожыя клумбы з аднаго і другога боку прахадной, на якой нас ветліва сустрэлі і, звярнуўшы ўвагу на захаванне масачнага рэжыму, накіравалі да кіраўніка.
Дарэчы, кукурузу на насенне вырошчваюць для завода ў дзясятках гаспадарак Брэсцкай вобласці. З іх толькі ў Івацэвіцкім гэтай вытворчасцю займаюцца 9 гаспадарак. Гэта ААТ «Мілейкі», «Падстарынь», «Косава», «Мічурынск», «Івацэвічыагратэхсервіс», «Перамога», «Новыя Стайкі», э/б «Майск» і філіял «Дабромысль».
Да ўборкі мацярынскай формы напачатку ўборачнага сезона, а ён сёлета пачаўся 25 жніўня, прыпадала 3190 гектараў. Убіраюць пачаткі тэхнікай дзяржаўнага прадпрыемства «Брэсттравы», у яе ліку пяць спецыялізаваных камбайнаў кукурузакалібровачнага завода. Яны працуюць у гаспадарках Столінскага, Брэсцкага, Драгічынскага, Пружанскага і Івацэвіцкага раёнаў. Адпаведна і на адвозцы ўраджаю «царыцы палёў» на завод заняты шэсць МАЗАЎ і КАМАЗ Івацэвіцкага кукурузакалібровачнага і часткова – наёмная тэхніка.
На сённяшні дзень з агульнай плошчы кліна ўбрана 1350 гектараў. Самая высокая ўраджайнасць па вобласці ў гаспадарцы «Брэсцкі аграрый» – 170 цэнтнераў з гектара, у гаспадарках Камянецкага раёна – 135-150, а ў Івацэвіцкім па ўраджайнасці пачаткаў лідзіруе ААТ «Мілейкі» – 108,6 цэнтнераў з гектара.
– Да сезона ўборкі мы падрыхтаваліся добра. Усё абсталяванне працуе, тэхніка таксама не падводзіць. Вельмі радуе сёлетні ўраджай кукурузы, – казала намеснік дырэктара кукурузакалібровачнага завода ў Івацэвіцкім раёне Іна КАСПЯРОВІЧ. – Па плане нам неабходна нарыхтаваць 25 тысяч тон кукурузных пачаткаў. З іх насення – 9 тысяч тон. На сёння мы ўжо ўбралі 1350 гектараў мацярынскіх форм, нарыхтавалі 14,5 тысячы тон пачаткаў, што складае 43 працэнты ад запланаванага. «Гарачы сезон» у нас не толькі для ўборкі кукурузных пачаткаў, а і для апрацоўкі і сушкі пачаткаў, абрушвання зерня з пачаткаў і яго сарціроўкі. Насушанага зерня ў сіласах нарыхтавалі 3,6 тысячы тон.
Мы ідзём па тэрыторыі завода. Трактарысты, вадзіцелі, каршчыкі, аператары, рабочыя на лініях – усе сваю справу ведаюць, працуюць без мітусні. З прыёмнага аддзялення па канвееры пачаткі кукурузы «бягуць» на ачыстку, а пасля гэтага паступаюць у сушыльнае аддзяленне, а з яго – у аддзяленне абмалоту, дзе насенне праходзіць папярэднюю ачыстку. Аддзяленне часовага захавання зерня кукурузы – гэта сіласы. Яно прызначана для прамежкавага захавання зерня перад канчатковай ачысткай і каліброўкай. Аддзяленне ачысткі і калібравання – для раздзялення насення кукурузы на фракцыі, а аддзяленне пратраўлівання і інкрустацыі насення – для падрыхтоўкі насення да сяўбы з мэтай абароны ад інфекцый і шкоднікаў, а таксама для расфасоўкі і зашыўкі мешкатары.
Працяг на 6-й стар.