«Гарачы сезон» для сонечнага насення
Заканчэнне.
Пачатак на 3-й стар.
Ёсць на заводзе свая лабараторыя аналізу насення, дзе работа вядзецца ў незаўважным, але не менш напружаным рытме таксама. Складанасць сезона ў тым, адзначала кіраўнік прадпрыемства, што сёлета вырошчвалі ажно 13 гатункаў насення кукурузы, з іх тры французскія – новыя. Тут на заводзе сартуюць ураджай па гатунках, бо гэта ж насенне, а яшчэ тут прывыклі «бачыць карціну» і асобна па гаспадарках, ды трэба, каб насенне па вільготнасці і якасці было блізкае, бо ў далейшым працэсе апрацоўкі важна не збівацца з рытму і пры настройванні абсталявання для чарговай аперацыі.
Шмат залежыць ад работы лабарантаў, якія кантралююць, каб насенны матэрыял не ўступаў па якасці імпартным аналагам. Яны правяраюць кукурузу на вільготнасць, фракцыйнасць, усходжасць і гібрыднасць паэтапна, спачатку на прыёмцы, потым на каліброўцы, на пратраўліванні. Усходжасць насення івацэвіцкі вытворца гарантуе на ўзроўні 96-98 працэнтаў.
Падчас сезона апрацоўкі пачаткаў кукурузы на заводзе працуе 128 чалавек. Акрамя пастаянных работнікаў працуюць і часовыя, але, як паказвае практыка, гэта ў асноўным адны і тыя ж людзі, якія зарэкамендавалі сябе з лепшага боку не за адзін сезон, і каго тут заўсёды рады бачыць у напружаны час, калі завод працуе кругласутачна.
Словам, тут створаны замкнуты цыкл вытворчасці насення кукурузы. Як адзначыла намеснік дырэктара, стараюцца ўсе, працуюць па сумленні, іншы раз не лічачыся з уласным часам. З нядаўняга часу тут вырасла зарплата і адпаведна ўзнікла матэрыяльная зацікаўленасць.
Завод працуе па безадходнай тэхналогіі. Адходы з пачаткаў – гэта мясцовы від паліва, яго рэалізуюць камунальнай службе. Насенне пасля дапрацоўкі рэалізуецца сельскагаспадарчым прадпрыемствам. І Брэсцкая вобласць з’яўляецца як сыравіннай зонай для завода, так і спажывецкай, а завод у Івацэвіцкім раёне поўнасцю задавальняе попыт гаспадарак у насеннай прадукцыі.