Кветкі да помніка
ў месцы масавага знішчэння яўрэяў ва ўрочышчы Марачоўшчына ўсклалі 27 студзеня, у Міжнародны дзень памяці ахвяр Халакосту
Ва ўрочышчы Марачоўшчына ў 1942 годзе былі расстраляныя больш за 3 тысячы яўрэяў, мірных жыхароў Косава. Тут яны знайшлі свой апошні прытулак. На месцы расстрэлу быў устаноўлены камень, пазней – помнік.
Да яго ўсклалі кветкі кіраўніцтва раёна, Косаўскага гарвыканкама і Квасевіцкага сельвыканкама, прадстаўнікі праваахоўных органаў, грамадскіх арганізацый і працоўных калектываў, духавенства, валанцёры і моладзь.
Гасцямі мерапрыемства сталі ўдзельнікі 58-га інтэрнацыянальнага «Зорнага паходу» па месцах баявой і працоўнай славы беларускага народа – 28 студэнтаў Беларускага дзяржаўнага педагагічнага ўніверсітэта ім. М. Танка і Маскоўскага дзяржаўнага педагагічнага ўніверсітэта.
Халакост, ці праследаванне і масавае знішчэння яўрэяў падчас Вялікай Айчыннай вайны, – найвялікшае злачынства. Трагедыя не абмінула і наш раён: гета існавалі ў Івацэвічах, Косаве, Целяханах і Быцені, праводзіліся масавыя расстрэлы яўрэйскага насельніцтва.
Пра тое, як гэта было ў Марачоўшчыне, пасля цырымоніі ўскаладння кветак маладым людзям распавяла старшыня Іва
цэвіцкай раённай арганізацыі Беларускага Чырвонага Крыжа Жанна КАСПЯРОВІЧ, якая доўгі час займалася даследаваннем тэмы Халакосту на тэрыторыі раёна разам са сваімі вучнямі. Пазней у Палацы Пуслоўскіх з яе ўдзелам ладзіўся квіз «Халакост» для студэнтаў і школьнікаў Косаўскай сярэдняй школы ім. А. Зайкі (перамагла студэнцкая каманда «Патрыёт»), працавала дыялогавая пляцоўка «Гісторыя Халакосту на тэрыторыі Івацэвіцкага раёна», а для студэнтаў правялі экскурсію па замку.
Да Міжнароднага дня памяці ахвяр Халакосту было прымеркавана і правядзенне раённага конкурсу малюнкаў «Памяць жывая» сярод школьнікаў. 1 месца ў ім заняла Мілана Рудзічэнка ( ДУА «Дзіцячая школа мастацтваў г. Івацэвічы», педагог – Л. В. Крукоўская), 2 месца – Аляксандра Канановіч (ДУА «Дзіцячая школа мастацтваў г. Івацэвічы», педагог – Л. В. Крукоўская), трэцяе – Марыя Крот (ДУА «Даманаўская сярэдняя школа», педагог – С. Р. Краўчэня).
Работы ўдзельнікаў конкурсу цяпер экспануюцца ў Івацэвіцкім гісторыка-краязнаўчым музеі, наведаць выстаўку можна да 15 лютага.
Чаму Міжнародны дзень памяці ахвяр Халакосту – 27 студзеня? У гэты дзень у 1945 годзе савецкія войскі вызвалілі канцлагер Аўшвіц (г. Асвенцім), найбуйнейшую гітлераўскую фабрыку смерці на тэрыторыі Польшчы, дзе загінула ад 1 да 1,5 млн чалавек, сярод якіх больш за 1 млн 100 тыс. яўрэяў. Такое не павінна паўтарыцца, таму і цырымонія ўскладання кветак да помніка атрымала красамоўную назву – «Мы помнім. Мы не забудзем».
Няхай жудасныя падзеі не забываюцца, няхай не паўтараюцца ніколі. Вольга МАЦВЕЕНЯ, фота Валерыя МІСКЕВІЧА.