РМУ – 10 гадоў
Урачыстасці з гэтай нагоды 12 красавіка ладзіліся ў палацы пуслоўскіх
Падчас мерапрыемства, прысвечанага 10-гадоваму юбілею філіяла Рамонтна-маставое ўпраўленне РУП «Брэстаўтадар», уручаліся ўзнагароды лепшым работнікам – у прысутнасці іх калег і ганаровых гасцей, сярод якіх – кіраўніцтва раёна і РУП «Брэстаўтадар», начальнікі ўпраўленняў (ДЭУ) галаўнога прадпрыемства. Гучалі віншавальныя прамовы, песні ў выкананні івацэвіцкіх артыстаў. Для ўдзельнікаў мерапрыемства правялі экскурсію па палацы.
РМУ абслугоўвае масты на рэспубліканскіх дарогах у Брэсцкай вобласці (усяго іх 416). Аналагаў яго ў Беларусі няма. Прадпрыемства базіруецца ў в. Яглевічы і мае 11 участкаў па ўсёй вобласці. Яно дынамічна развіваецца. Штат за 10 гадоў узрос з 36 да 75 работнікаў. У планах адкрыць дадатковыя ўчасткі ў Драгічыне, Пружанах, Каменцы.
Як расказаў падчас свайго выступлення начальнік філіяла РМУ РУП «Брэстаўтадар» Аляксандр Мацвееня, за гады існавання ўпраўлення праведзены бягучы рамонт 82 штучных збудаванняў, выконваліся работы па ўтрыманні мастоў, абслугоўванні дэфармацыйных швоў, вырабе металаканструкцый – парэнчаў, апор дарожных знакаў – на створаным у 2015 г. участку падсобнай вытворчасці і механізацыі. Стараннямі РМУ колькасць крытычных дэфектаў на мастах за апошнія пяць гадоў зменшылася на 36 %. Але іх па-ранейшаму шмат: мастамі, у адрозненні ад дарог, доўгі час ніхто не займаўся, таму стварэнне РМУ было правільным і своечасовым крокам.
Што яшчэ зроблена? Павышалася кваліфікацыя кадраў, умацоўвалася матэрыяльна-тэхнічная база, набывалася абсталяванне і тэхніка. Дзякуючы ўкараненню новых механізмаў і інавацыйных матэрыялаў паменшылася працаёмкасць ручных работ, у гэтым кірунку і далей будуць прыкладвацца намаганні. Рэзультаты работы прадпрыемства за 2023 год у лічбах: рэнтабельнасць продажу – 10, 9 %, чысты прыбытак – 192 тыс. руб., сярэдняя зарплата – 1 833 руб.
Аляксандр Сяргеевіч падкрэсліў, што ўсе дасягненні сталі магчымымі дзякуючы намаганням калектыву і падтрымцы калег – РУП «Брэстаўтадар» і дарожна-эксплуатацыйных упраўленняў: супольна атрымалася стварыць РМУ.
Намеснік старшыні райвыканкама Андрэй Рэгес, віншуючы калектыў, успомніў той час, калі прадпрыемства толькі стваралася на базе былога ДЭУ-2, і цяжкасці, якія давялося пераадолець. Калектыў расце ва ўсіх сэнсах – і колькасна, і праз павышэнне кваліфікацыі: гэта заканамерна. Штучных збудаванняў, мастоў на дарогах шмат, і абслугоўваць іх трэба належным чынам.
– Жадаю, каб ваша арганізацыя працавала, удасканальвала навыкі, тэхнічна пераўзбройвалася. Планы амбіцыйныя. Спадзяюся, што вы даб’яцеся поспеху, а для гэтага вам спатрэбіцца моцнае здароўе, якога таксама жадаю, як і атрымання задавальнення ад работы, добрых зарплат, – рэзюмаваў Андрэй Пятровіч і ўручыў шэраг узнагарод ад райвыканкама.
Выступалі і іншыя ганаровыя госці, у тым ліку былы генеральны дырэктар РУП «Брэстаўтадар» Міхаіл Непачаловіч – стварэнне рамонтна-маставога ўпраўлення было яго ідэяй. Кароткі экскурс у гісторыю дапамог яшчэ раз упэўніцца, што яна была ўдалай.
Уручала ўзнагароды і таксама віншавала калектыў намеснік генеральнага дырэктара па эканоміцы і фінансах РУП «Брэстаўтадар» Наталля Раманюк:
– 10 гадоў – здаецца, малы і пры гэтым такі вялікі шлях. Добра помню, як усё пачыналася, як не атрымлівалася, колькі было пытанняў... Цяпер прадпрыемства цвёрда стаіць на нагах, развіваецца, мае вялікія перспектывы, з эканомікай усё выдатна, няма цякучасці кадраў, ёсць касцяк, на які можна апірацца. Ад усёй душы
жадаю калектыву ўсяго найлепшага, міру, цяпла, дабра. Выконвайце работу з душой, якасна, з кожным годам усё лепш і лепш.
Падчас урачыстасцей было ўручана 18 узнагарод: Граматы і Падзячныя пісьмы Івацэвіцкага райвыканкама, Ганаровыя граматы РУП «Брэстаўтадар», Ганаровыя граматы і падзякі аб’яднанай прафсаюзнай арганізацыі РУП «Брэстаўтадар» і пярвічнай прафсаюзнай арганізацыі філіяла РМУ, Ганаровыя граматы і Падзякі філіяла РМУ.
Далучаемся да віншаванняў і зычым калектыву РМУ далейшых поспехаў, каб удалося пракласці трывалы мост паміж ім і жаданымі мэтамі.
Вольга ШЭЛЯГОВІЧ. Фота Паліны САУЦІНАЙ.