Дзіцячыя акцыі ДАІ…
На мяжы канікулаў і пачатку новага навучальнага года на тэрыторыі краіны стартуе акцыя “Увага – дзеці!”. Спецыяльнае комплекснае мерапрыемства пройдзе з 25 жніўня па 5 верасня. У гэты час вадзіцелям нават у светлы час сутак будзе неабходна рухацца з уключаным блізкім святлом фар на транспартным сродку. За невыкананне гэтага патрабавання прадугледжаны штраф да 2-х базавых велічынь. У гэту суботу пройдзе яшчэ і адзіны дзень бяспекі дарожнага руху. Яго дэвіз: «У новы навучальны год — бяспечных усім дарог!».
…і МНС
На тыдні стартавала яшчэ адна рэспубліканская акцыя. У гэтым выпадку пад эгідай Міністэрства па надзвычайных сітуацыях. «У цэнтры ўвагі — дзеці» пройдзе ў тры этапы. Супрацоўнікі МНС і юныя выратавальнікі ў аб'ектах гандлю раскажуць пра прычыны ўзнікнення надзвычайных сітуацый, раздадуць памяткі і брашуры, нагадаюць бацькам аб неабходнасці навучання дзяцей правілам бяспекі. З 1 па 14 верасня прафілактычныя гутаркі працягнуцца на школьных лінейках, класных гадзінах і бацькоўскіх сходах. Акрамя гэтага, ва ўстановах адукацыі пройдуць планавыя эвакуацыі і тэматычныя ўрокі бяспекі, а замацаваць веды можна будзе ў шматлікіх конкурсах і віктарынах.
Зноў праігралі
Чарговая гульня чэмпіяната Магілёўскай вобласці па футболе зноў скончылася для нашай каманды няўдала. Быхаўчане саступілі Чэрыкаву 5: 3. Рэабілітавацца нашы хлопцы паспрабуюць ужо ў нядзелю. Іх чакае гульня ў Краснаполлі.
Я цябе малюю
У Абідавічах дзеці малявалі на асфальце. Пад увагай работнікаў культуры на летняй пляцоўцы «Вясёлая карусель» прайшоў конкурс дзіцячых малюнкаў мелам «Маляўнічае лета». Атрымалася сімпатычна і карысна: дзецьмі атрымана шмат станоўчых эмоцый.