Сябар Лесік
На мінулым тыдні ў Мінску прадставілі талісман іі Еўрапейскіх гульняў, якія пройдуць у Мінску з 21 па 30 чэрвеня 2019 года. Сімвалам галоўнай спартыўнай падзеі ў Беларусі ў наступным годзе стала лісяня Лесік.
Арганізатары расказалі пра легенду з'яўлення Лесіка, якая аб'ядноўвае вядомы ва ўсім свеце твор літаратуры і беларускую міфалогію. У казцы пра Маленькага прынца было лісяня, якое навучыла галоўнага героя сапраўднай дружбе. Аднак калі Маленькі прынц паляцеў на сваю планету, лісяня засталося, і ўсе яго думкі былі толькі аб тым, як знайсці новых сяброў. Пошукі былі доўгімі, лісяняці даводзілася пастаянна прыслухоўвацца, таму яго вушы прыкметна выраслі, але аднойчы ён даведаўся, што існуе кветка, якая спаўняе ўсе жаданні, – легендарная беларуская Папарацькветка. Лісяня адправілася ў Беларусь, каб знайсці яе і здзейсніць сваю мару. Шлях у яго быў не блізкім, яму давялося зрабіць мільён крокаў, што можа даказаць яго фітнес-бранзалет.
Лесік апрануты ў шорты і майку, на ім бейсболка з надпісам – слоганам ІІ Еўрапейскіх гульняў. Яго колеры адпавядаюць духу спаборніцтваў: чорны сімвалізуе рашучасць, жоўты – жыццярадаснасць, зялёны – развіццё, сіні – несакрушальнасць, а чырвоны – энергічнасць.
Арганізатары пры выбары талісмана атрымалі каля 2 тысяч работ. Пасля таго як былі адабраны фінальныя варыянты, над ім яшчэ паўгода працавалі прафесійныя мастакі.
Талісман Лесік ужо актыўны ў сацсетках, у яго з'явілася свая старонка ў Instagram – Lesik_2019.